आईएल टी २० मा एक म्याच पनि नखेली फर्किएका दीपेन्द्र सिधै अर्जुन ट्रफीमा

काठमाडौं । यूएईमा जारी इन्टरनेसनल लिग टी २० मा भाग लिएर नेपाली अलराउन्ड दीपेन्द्रसिंह ऐरी स्वदेश फर्किएका छन् । सो प्रतियोगितामा गल्फ जायन्ट्सबाट प्रतिनिधित्व गरेका उनले एक म्याच पनि खेल्न पाएनन् ।

दीपेन्द्रको टीम कमजोर प्रदर्शन गर्दै समूह चरणबाट आउट भएको थियो । अर्का नेपाली अलराउन्डर कुशल मल्लको टिम डेजर्ट भाइपर्स भने प्रतियोगिताको फाइनलमा पुगेको छ । आज डेजर्ट भाइपर्स र दुबइ क्यापिटलबीच उपाधि भिडन्त हुँदैछ । टीमले फाइनलसम्मको यात्रा तय गर्दा कुशलले भने एक म्याच पनि खेल्न पाएका छैनन् । यद्यपि, डेजर्टले फाइनलमा जिते उनी उपाधि विजेता बनेर फर्किन सक्नेछन् ।

दीपेन्द्र भने दुबईबाट फर्किए लगत्तै घरेलु लिग खेल्न धनगढी पुगेका छन् । धनगढीको फाप्ला अन्तर्राष्ट्रिय क्रिकेट मैदानमा जारी अर्जुन ट्रफीको सेमिफाइनलमा आज उनी सहभागी भए । धनगडी र अत्तरियाबीच सेमिफाइनल खेल अहिले जारी छ ।

डीसीए धनगढीबाट खेलेका दिपेन्द्र १५ रन बनाएर आउट भएका छन् । उनले १८ बलको सामना गर्दा एक चौका प्रहार गरे । उनलाई अत्तरियाका कमल गुप्ताले सहाब आलमको हातबाट क्याच आउट गराएका हुन् ।

अत्तरियाविरुद्ध धनगढीले कमजोर ब्याटिङ गरिरहेको छ । ओपनर लोकेश बम १२ बलमा ११ रन बनाएर आउट भए ।
अभिषेक पलले २७ रन बनाए । आठौं नम्बरमा आएका मिलन बोहोराले केही आक्रामक सटहरु खेल्दै टिमलाई थोरै राहत दिएका छन् ।