मोदीको दश वर्षे सत्ताकालमा अमेरिकाले फर्कायो १२ हजार बढी भारतीय अवैध आप्रवासी (सूचीसहित)

काठमाडौं । हालै अमेरिकाले अवैध आप्रवासीको रुपमा रहेका भारतीयहरुलाई हतकडी र नेल लगाएर भारतमा ल्याएसँगै यसमा धेरै कोणबाट आलोचना भएको छ । आलोचना ट्रम्प सरकारले आप्रवासीहरुलाई गरेको अमानवीय व्यवहारको मात्रै छैन, आफ्ना नागरिकको सुरक्षा र सम्मानलाई ख्याल नगरेको भन्दै भारतीय प्रधानमन्त्री नरेन्द्र मोदी र विदेशमन्त्री एस. जयशंकरको पनि आलोचना भएको छ ।

अर्को हप्ता अर्थात् फेब्रुअरी १२ र १३ मा अमेरिकाको औपचारिक भ्रमणमा ह्वाइट हाउस पुगेर ट्रम्पसँग वार्ता गर्न कसिएका मोदीलाई यो घटनाले झड्का दिएको छ । अमेरिकाको सीमा सुरक्षामा खटाइएका सैन्य अधिकारी ब्रिगेडियर जनरल माइकल डब्ल्यू बैंकले सामाजिक सञ्जालमा भारतीयहरुलाई हतकडी र नेल लगाएको तस्बिर सार्वजनिक गरेर ‘इलिगल इन्डियन एलियन’ भनेपछि झनै भारत सरकारको आलोचना चुलिएको छ ।

यसबारेमा भारतीय संसदमै पनि कुरा उठेको छ । कुरा उठ्दा भारतीय विदेशमन्त्री जयशंकरले विभिन्न वर्षमा भारतीयहरुलाई फर्काइएको बताए । र, उनैले मोदी सरकारको कार्यकालभरिका तथ्यांक पनि दिए । जसअनुसार सबैभन्दा धेरै फर्काइएको साल सन् २०२४ देखिएको छ । त्यो साल १ हजार ३६८ भारतीय फर्काइएका थिए ।

मोदीको सत्ताकालमा साढे १२ हजारभन्दा धेरै भारतीय अमेरिकाबाट फर्काइएको पाइएको छ । मोदी सरकारका पछिल्ला दर्श वर्षको सत्ताकालमा विभिन्न वर्षमा फर्काइएका भारतीयहरुको आँकडा यस्तो छः

• सन् २०१४ : ५९१
• सन् २०१५ : ७०८
• सन् २०१६ : १३०३
• सन् २०१७ : १०२४
• सन् २०१८ : ११८०
• सन् २०१९ : २०४२
• सन् २०२० : १८८९
• सन् २०२१ : ८०५
• सन् २०२२ : ८६२
• सन् २०२३ : ६७०
• सन् २०२४ : १३६८
• सन् २०२५ : १०४