पहिलोपटक एडल्ट फिल्ममा आँचल, भन्छिन्- दया दाईले गर्दा सजिलो भयो

काठमाडौं । रिलिजको १० दिन अगाडि मात्र ट्रेलर सार्वजनिक गरिएको चलचित्र ‘दुःखी आत्मा’ यसको ‘एडल्ट’ विषयवस्तुका कारण चर्चामा छ । चलचित्रको ट्रेलरमा समावेश यौनजन्य र द्विअर्थी संवादलाई लिएर कलाकारहरु ट्रोल बनिरहेका छन् ।

दिपेन्द्र लामा निर्देशित यस चलचित्रमा दयाहाङ राई र आँचल शर्माको जोडी छ । दयाहाङले यौन दुर्बलता भएको एक कविको भूमिका निकाएका छन् । उनीहरु दुवैले ‘एडल्ट’ फिल्ममा अभिनय गरेको पहिलोपटक हो । उनीहरुले यसअघि पनि केही चलचित्रमा स्क्रिन सेयर गरेका थिए, तर यस्तो ‘सेन्सुअल’ चरित्रमा देखिएका थिएनन् ।

विवाहित अभिनेत्री आँचलले कसरी यस्तो चलचित्र खेल्न तयार भइन् भनेर पनि कतिपय दर्शक आश्चर्यमा परेका छन् । चलचित्रमा उनले निभाएको भूमिकामा मुलधारका नायिकाले सहजै हिम्मत जुटाउँदैनन् । अझ विवाहित नायिकाहरुका लागि यो झन् गाह्रो निर्णय हो ।

यसै चलचित्र र पात्रलाई लिएर नायिका आँचल शर्मासँग गरिएको छोटो कुराकानी:

-एडल्ट फिल्म खेल्न कसरी तयार हुनुभयो ? स्क्रिप्ट पढ्दा सुरुमा के सोच्नुभएको थियो ?

मलाई यो चलचित्रको प्रस्ताव निर्देशक दिपेन्द्र लामा दाइमार्फत नै आएको थियो । सुरुमा कथा सुन्दा मलाई पनि डर लागेको थियो किनकी मेरो लागि पनि यो भिन्न जनरा हो । सुरुमा सुन्दा नै, म कहाँ गर्न सक्छु र यस्तो चलचित्र, वा अझ भनौँ मलाई सुहाउदैन भनेजस्तो लागेको थियो ।

तर मलाई कन्टेन्ट भने मन पर्यो । यसमा मान्छेको समस्याबारे बोलिएको छ । त्यही समस्यालाई देखाउने क्रममा केही डाइलगहरु अलि सेन्सुयल टाइपको राख्नु परेको हो । तर समग्रमा चलचित्र सन्देशमुलक बनेको छ । कन्टेन्ट राम्रो भएकै कारण मैले चलचित्र साइन गरेको हो ।

-साइन गर्नुअघि यसको विषयवस्तुबारे श्रीमानसँग शेयर गर्नुभयो कि भएन ?

गरेँ । मैले सुनाएँ सबै । चलचित्रलाई लिएर उहाँ पनि धेरै उत्साहित हुनुहुन्थ्यो । पहिलोचोटि हो, प्रयास गर्दा हुन्छ भन्ने भयो । मेरै लागि पनि यो एउटा चुनौती थियो । गर्न सक्छु या सक्दिन भन्ने थियो । यो चलचित्र मैले मेरै लागी गरेको हो ।

-ट्रेलरबाट कस्ता प्रतिक्रियाहरु पाइरहनुभएको छ ?

अहिलेसम्म त मिक्स प्रतिक्रिया पाइरहेको छु । नयाँ कन्टेन्ट भएकाले एकैचोटि सबैलाई बुझ्न गाह्रो हुन्छ । स्वीकार्न पनि गाह्रो हुन्छ । तर ट्रेलर ट्रेन्डिङमा पुगिसकेको छ । सायद रुचाउनुहुन्छ होला । अहिले नै केही भन्न सकिदैन ।

चलचित्र हेरेपछि मात्र दर्शकले कसरी लिनुहुन्छ भन्ने प्रष्ट हुनेछ । कथा थाहा हुन्छ नि त । अहिले त सानो–सानो क्लिप हेर्ने हो । त्यही भएर कसैले बुझ्नुहुन्छ, कसैले के होला भनेर दोधारमा पर्नुहुन्छ ।

-यस्तो कन्टेन्ट नेपाली दर्शकले नपचाउने हुन् कि भन्ने डर कत्तिको छ ?

सुरुमा चाहिँ थियो । मैले यस्तो चरित्र कहाँ गर्न सक्छु होला र भन्ने थियो । पछि बिस्तारै होइन, यो त सन्देश हो भन्ने लाग्यो । सुरुमा त दर्शकलाई पनि कस्तो चलचित्र होला भन्ने लाग्ला ।

किनकी कथा नखुल्दासम्म दर्शकलाई थाहै हुन्न यो कस्तो चलचित्र हो भन्ने । त्यही भएर दर्शकलाई सुरुमा नराम्रो सोच आउनु स्वभाविकै हो । तर चलचित्र हेरेपछि थाहा हुन्छ । मेरो लागि पनि यो नयाँ चुनौती हो । नयाँ सिकाइ हो ।

-एडल्टहरुलाई मात्र समेटेको चलचित्रले व्यवसायीक रुपमा सफलता कमाउन सक्ला ?

यस्तो हो, केटा मान्छेको रोगको बारे हामीले कहिले कुरा गर्दैनौं । केटा मान्छेको पिडा हामी बुझ्न खोज्दैनौं । जुन विषय हामीले चलचित्रमा उठाएका छौं, त्यो भनेको ४० वर्ष माथिका ७० प्रतिशत पुरुषमा देखा पर्ने कुरा हो । त्यो पनि खुलाएको डाटा मात्र । नखुलाउने त कति होलान् ।

४० कटेका मात्र होइन, २०-३० वर्ष कटेका २०-३० प्रतिशत पुरुषमा पनि यो समस्या देखिएको रहेछ । यो समस्याबारे खुलेर कति बोल्न सक्नुहुन्न । लाज हुन्छ वा भन्यो भने बेइज्ज्त हुन्छ भन्ने सोच हुन्छ । त्यसैले यो व्यक्तिगत तर सन्देशमुलक कुरा हो । त्यही भएर पनि चलचित्र हेर्न आउनुहुन्छ भन्ने लाग्छ ।

-यो फिल्मले तपाईंको इमेज बिगार्छ जस्तो लाग्दैन ?

लाग्दैन । चलचित्रमा आँचल छैन, अनामिका छ, अनि पुरुषको समस्या छ । मैले कलाकार भएर एउटा पात्र निभाएर सन्देश छर्न खोजेको छु । बाँकी त दर्शकले कसरी लिनुहुन्छ भन्ने हो ।

म एउटा कलाकार हो र मैले समयअनुसार जस्तो पनि पात्र निभाउनुपर्ने हुन्छ । आफुले गर्न सक्ने जति काम म गर्छु । सायद दर्शकले पनि व्यक्तिगत जिवन र व्यवसायिक जीवनलाई एउटै हिसावले लिनुहुन्न होला ।

ट्रेलरले मान्छेमा कस्तो छाप छाड्यो त्यो मलाई थाहा भएन, तर चलचित्रमा अनामिका एउटा साघारण केटी हो । अहिलेको जमानाको खुला सोच भएको सामान्य पात्र हो । मेरो पात्रले महिलालाई हेर्ने दृष्टिकोण पनि बदल्न खोजेको छ ।

हामी सामान्यतया खुला विचार भएर फ्याट्ट बोलिहाल्ने केटीहरुलाई अलि नराम्रो र चुप लाग्ने अनि थोरै बोल्नेलाई राम्रो भन्ने गर्छौं । होटलमा पस्ने बित्तिकै छोरी मान्छे खत्तम नै हुन्छन् भन्ने सोच कतिमा अझै पनि छ । यस्तै–यस्तै मान्छेको विचारहरु चिर्ने काम चलचित्रल गरेको छ । इमेज बिगार्ने भन्दा पनि मलाई लाग्छ, अनामिका पात्रले एउटा छुट्टै ग्राफ क्रियट गर्न सक्छ ।

-द्विअर्थी र भल्गर डाइलगहरु पनि छन्, सुटिङ गर्न कत्तिको गाह्रो भयो ?

दया दाई भएर काम गर्न सजिलो भयो, अरु भएको भए गाह्रो हुन्थ्यो होला । तर दया दाईको बानीव्यहोरा र उहाँको कामका कारण यो कन्सेप्टमा काम गर्न सजिलो भयो ।