बेलबारीमा बाल साहित्य तथा धिमाल भाषा गोष्ठी

विराटनर । मोरङको बेलबारीमा दुई दिवसीय बाल साहित्य तथा धिमाल भाषा गोष्ठी एवम् रचना वाचन कार्यक्रम भएको छ । बेलबारी साहित्य विकास समिति र नेपाल प्रज्ञा-प्रतिष्ठानको संयुक्त आयोजनामा भएको कार्यक्रममा बेलबारी नगर क्षेत्रका विद्यार्थीहरुले रचना वाचन गरे ।

नेपाल प्रज्ञा-प्रतिष्ठानका उपकुलपति तथा वरिष्ठ साहित्यकार विमल निभाको प्रमुख आतिथ्यमा सम्पन्न कार्यक्रममा बेलबारी नगरपालिकाले प्रथम धिमाल जातिका दुई व्यक्तित्व अजित धिमाल र कविन्द्र धिमाललाई सम्मान गरेको छ ।

कार्यक्रममा अजित धिमालले धिमाल भाषा, भेषभुषा, रहनसहन र संस्कृतिसम्बन्धी ९ पृष्ठको शोधपत्र प्रस्तुत गरेका थिए । साहित्य विकास समितिले अमेरिकी विश्वविद्यालयबाट मानार्थ विद्यावारिधि प्राप्त गरेका साहित्यकार छवि बैरागी र बाल साहित्यका अग्रज साहित्यकार हस्त थापालाई पनि सम्मान गरेको छ ।

राजकुमार राई, उमा सिजापती र विष्णु भण्डारी आचार्यलाई आजीवन सदस्यता प्रदान गरेको कार्यक्रममा साहित्यकार ईरान राई सेवकले बाल साहित्यको भविष्यसम्बन्धी विवरणात्मक शोधपत्र प्रस्तुत गरेका थिए ।