रवि लामिछानेको स्वास्थोपचार गरी कागजात पेश गर्न अदालतको आदेश

काठमाडौं । जिल्ला अदालत कास्कीले राष्ट्रिय स्वतन्त्र पार्टी (रास्वपा) सभापति रवि लामिछानेलाई उच्च रक्तचापको समस्या रहेकोले स्वास्थोपचारका लागि आदेश दिएको छ । जिल्ला अदालतका न्यायाधीश हिमलाल बेल्वासेले लामिछानेको आज ४ दिन म्याद थप गर्ने क्रममा सो आदेश दिएका हुन् ।

लामिछानेसँगै पूर्व डिआइजी छविलाल जोशीको हकमा पनि सोही आदेश दिइएको छ ।

अदालतले भनेको छ, ‘प्रतिवादीहरु रवि लामिछाने र छविलाल जोशीको उच्च रक्तचापको समस्या रहेको भन्ने देखिएको हुँदा चिकित्सकबाट जाँच तथा आवश्यक उपचार गराइ उपचारसँग सम्बन्धित कागजातको प्रतिलिपि यस अदालतमा पेश गर्नु र अनुसन्धानका क्रममा हिरासतमा राख्नका लागि म्याद थप गरिएका व्यक्तिहरुको मानवअधिकारको उल्लंघन हुने कुनै कार्य नगर्नु, नगराउनु भनि जिल्ला प्रहरी कार्यालय कास्कीलाई लेखि पठाउनु ।’

अदालतले लामिछाने र जोशीसँगै लिला पछाई, रामबहादुर खना, र कृष्णबहादुर गुरुङलाई पनि एउटै कसुरमा थप चार दिन थुनामा राख्ने गरी अनुमति दिएको छ ।

प्रहरीले उनीहरु तीनैजनामाथि सहकारी ठगी गरी सम्पत्ति सुद्धीकरण गरेको सम्बन्धी कसुरमा अनुसन्धान नसकिएकाले म्याद थपका लागि आदेश मागेको थियो ।

पक्राउ परेका कसूरबाट आर्जित सम्पत्तिको मुल्यांकन गरी विगो कायम गर्न बाँकी रहेको, प्रतिवादीहरुको कारोवार रहेको घर–जग्गा खरिद विक्रीको लिखित सम्बन्धित कागज प्रमाण प्राप्त भइनसकेको प्रतविादीहरु संलग्न रहेको म्वद्ध कसूरको वर्गीकरण गरी अनुसन्धान प्रतिवेदन तयार हुँदै रहेको प्रहरीको दावी छ । सोही आधारमा अदालतले आज २३ गतेबाट लागू हुने गरी पाँचै जनाको ४ दिन म्इाद थपेको हो ।