चलचित्र ‘गुन्युचोलो’ बाट आकाशले पाए पिजिए मार्क (प्रोडयुसर गिल्ड अफ अमेरिका) अवार्ड

काठ्माडौं । समुन्द्र भट्ट निर्देशित चलचित्र ‘‘गुन्यो चोलो–कमिङ अफ अ्याज अफ अ गर्ल’ उर्फ ‘गुलाबी’’ को निर्माण टीमलाई फेरि अर्को खुसीको खबर प्राप्त भएको छ । चलचित्रका निर्माता आकाश बुढाथोकीले अमेरिकाको पिजिए मार्क(प्रोडयुसर गिल्ड अफ अमेरिका) पाएका छन् ।

आकाशले नेपालका ट्रान्सजेन्डरहरुको पहिचान र सामाजिक चुनौतिहरूको खोजी गर्ने प्रकारको नेपाली चलचित्र बनाएकोमा यो अर्वाड प्राप्त गरेका हुन् ।

अमेरिकाको पिजिए मार्क(प्रोडयुसर गिल्ड अफ अमेरिका) एक प्रतिष्ठित प्रमाणीकरण हो जसले चलचित्र र टेलिभिजनको संसारका निर्माता वा सबैभन्दा प्रभावशाली र मनोरञ्जनात्मक उत्पादन उपलब्धिहरूलाई सम्मान गर्ने गर्दछ । र यो अर्वाड प्राप्त गर्ने लिस्टमा कमै नेपाली निर्माताहरु पर्ने गर्दछन् ।

यो चलचित्र केही समय अघिमात्र अमेरिकाको प्रतिष्ठित तस्वीर फिल्म मार्केटमा पनि छनोट भएको थियो ।

अमेरिकी कम्पनी ‘भिजन ईन्टरटेन्मेन्ट’ र ‘दि स्काई ओसन ईन्टरटेन्मेन्ट’ को ब्यानरमा निर्माण भएको चलचित्रले पारलैंङ्गिकताको कथालाई उठान गरेको छ। जहाँ नाजिरले पारालैंगिक महिला (ट्रान्सवुमन)को भूमिका निर्वाह गरेका छन् ।

चलचित्रमा समुन्द्र भट्टसँगै नाजिर हुसेनको पटकथा तथा संवाद छ । नाजिरको अलावा चलचित्रमा अभिनेत्री संचिता लुइँटेल, सुशील सिटौला, अनुपम श्रेष्ठ र विशाल पहारीलाई पनि मुख्य भूमिकामा देख्न सकिन्छ ।

चलचित्रको अन्तर्राष्ट्रिय वितरण अधिकार अमेरिकाको बफेलो एट्ले खरिद गरेको छ । यो चलचित्रलाई फेस्टिभल सर्किटपछि नेपालमा प्रदर्शन गरिने निर्देशक भट्टले जानकारी दिएकी छन् ।

चलचित्रको सम्पूर्ण पोस्ट प्रोडक्सनको काम हलिउड शैलीमा बाहिरै गरिएको छ । चलचित्रमा हलिउडकी भ्वाइस आर्टिस्ट लिजा जेरार्डले स्वर दिएकी छिन भने ब्याकग्राउन्ड म्युजिकको सम्पूर्ण काम मार्सेलो दि फ्रान्सिसीले गरेका छन् ।

नेपाली फिल्म प्रोड्क्सन हाउस र हलिउड फिल्म प्रोड्क्सन हाउसको संयुक्त कोलाबोरेसनमा बनेको यो चलचित्रमा आकाश बुढाथोकी र भि भन्से जानुबोनको लगानी छ ।

चलचित्रको कार्यकारी निर्माता जेफ्री जे वेन र स्टिभ जोन्स्टन हुन भने अनुपम श्रेष्ठ चलचित्रका सहयोगी निर्माता हुन् ।

आलोक शुक्लाले खिचेको चलचित्रमा लेखु सहयात्रीको गीत रचना र विजय बस्यालको प्रोड्क्सन डिजाईन रहेको छ । चलचित्रमा पुष्कर लामा प्रोडक्सन हेडमा छन् भने राम भण्डारी चलचित्रका क्रिएटिभ हेड हुन् ।