‘सानो संसार’ का निर्माता अर्जुनकुमारको क्रन्दन : ‘स्क्याम’ गर्न नजानेर डुब्यौं

काठमाडौं । समीक्षकहरुबाट राम्रो प्रतिक्रिया पाएको चलचित्र ‘सानो संसार’ अहिले देशभर दैनिक दुई शो चलिरहेको छ । एउटा शो सिटी स्क्वायर मलमा ५ः४५ को छ भने अर्को शो राइजिङ मलमा एक बजे छ ।

यो चलचित्र दुईपटक रिलिज भयो । दसैं अगाडि सानो संसार रिलिज भएलगत्तै बाढीपहिरोको विपत्तिले गर्दा जनजीवन अस्तव्यस्त बन्यो निर्माताले चलचित्रलाई हलबाट उतार्ने निर्णय लिए । त्यसपछि कात्तिक ९ गतेबाट पुनः प्रदर्शनमा आए पनि चलचित्रले दर्शक तान्न सकेन ।

चलचित्र हेरेका दर्शकले ‘सानो संसार’ लाई रुचाइरहेका छन् । तर, दर्शक हलसम्म नआइदिएपछि गर्ने के ? चलचित्रले पानी भन्न पाएन । हुँदाहुँदा अहिले २ शोमा खुम्चिएको छ । निर्माता अर्जुन कुमार फेसबुकमा दिनहुँ थप शोका लागि याचना गरिरहेका छन् । तर, ‘पूर्णबहादुरको सारंगीे’ मा सारा दर्शक झुम्मिएको बेला उनको याचना सुन्ने कसले ?

चलचित्र चलाउनका लागि आफूहरुले फन्डा गर्न नजानेको निर्माता अर्जुन कुमारको विश्लेषण छ ।

उनले दुखेसो पोखे, ‘हामीले स्क्याम गर्न जानेनौं । हल्ला गर्न जानेनौं । राम्रा कलाकार राखेर राम्रो फिल्म बनाउन सकिन्छ भनेर ठूला स्टारकास्ट खोजेनौं । तर, नेपाली दर्शकलाई त फन्डा गरिदिनुपर्ने रहेछ, स्क्याम गरिदिनुपर्ने रहेछ । दर्शकलाई झुक्याउन सकियो भने पनि फिल्म हलमा टिक्ने थियो होला । हामीलाई त चलचित्र क्षेत्रकै सपोर्ट छैन ।’

‘भाइरलहरुले के बोले, कसको घर झगडा भयो, कसले के भन्यो भन्नेतिर ध्यान हुने दर्शकलाई मेरो केही भन्नु छैन । नेपालीलाई त झुक्याउनैपर्ने रहेछ, स्क्याम गर्नैपर्ने रहेछ । हिजो प्रजातन्त्र, बहुदल भनेर झुक्याए । आज नयाँ पार्टी, वैकल्पिक भनेर झुक्याइरहेका छन् । हामीले यही झुक्याउने कला जानेनौं ।’

सामाजिक सञ्जालमा त फिल्मको राम्रो प्रशंसा भइरहेको छ नि भन्ने प्रश्न उनले जवाफ दिए, ‘फेसबुकमा लेखेर मात्रै हुँदैन । दर्शकले टिकट काटिदिएर हेरिदियो भने पो हलहरुमा शो रहन्छ । अहिले जति पनि चलचित्र बनेका छन्, भिडाएर हेरौं न कसले राम्रो बनाएको रहेछ । म सबैलाई चुनौती दिन्छु ! तर, हल्ला गर्ने कला नभएपछि पछि परियो ।’

अरु चलचित्रलाई आफूले सपोर्ट गरे पनि अरुबाट आफूले सपोर्ट नपाएको उनी बताउँछन् ।

‘अगाडि बाढीले दुःख दियो । अहिले हाम्रो पिकअप लिने बेला अर्को फिल्म आयो । हामीलाई जति शो छ, सबै हाउसफुल छ । अब कहाँ गएर कराउने ? कहाँ गएर रुने ?’

‘चपली हाइट’, ‘फाटेको जुत्ता’ जस्ता फिल्मका निर्माता समेत रहेका अर्जुन कुमार फिल्मको लगानी जसोतसो उठाउने बताउँछन् । डिजिटल राइटस्, विदेशको राइटस् लगायतबाट ७० लाखमा बनेको फिल्मको लगानी सुरक्षित हुने उनको भनाइ छ । हलहरुबाट भएको कलेक्सन सुनाउन उनले लाज माने ।