युट्यूव हेर्दै पित्तथैलीको शल्यक्रिया- १५ वर्षीय किशोरको मृत्‍यु

काठमाडौं । छिमेकी मुलुक भारतको विहारस्थित सारण जिल्लामा डाक्टर बनेर युट्युव हेर्दै शल्यक्रिया गर्दा १५ वर्षीय एक किशोरको ज्यान गएको छ ।

भारतीय सञ्चारमाध्यम इण्डिया टुडेका अनुसार नक्कली डाक्टरले युट्यूव हेर्दै पित्तथैलीको ढुंगा निकाल्ने शल्यक्रियाको प्रयास गरेका थिए । समाचारअनुसार किशोरलाई बान्ता र पेट दुख्ने समस्या देखिएपछि परिवारले कथित डाक्टर अजितकुमार पुरीको क्लिनिकमा लगेका थिए ।

परिवारका सदस्यका अनुसार पुरीले उनीहरूको जानकारी तथा सहमतिविना किशोरीको शल्यक्रिया सुरू गरेका थिए । उनले मोबाइलमा युट्यूव भिडिओ हेरेर शल्यक्रिया गरेको परिवारको आरोप छ । शल्यक्रिया सुरू भएलगत्तै किशोरको अवस्था थप बिग्रिएको परिवारले विरोध जनाउँदा पुरीले ‘म डाक्टर हुँ कि तपाईँहरू ? झपारेका थिए ।

किशोरको अवस्था बिग्रिँदै गएपछि पुरीले उनलाई पटनास्थित अस्पतालमा लैजान लागेका थिए । सोहीक्रममा किशोरको बाटोमै मृत्‍यु भएको हो । किशोरको मृत्‍यु भएलगत्तै पुरी फरार छन् ।

घटनापश्चात पुरीमाथि लापरवाही र दुर्व्यवहार आरोप परिवारले प्रहरीमा उजुरीसमेत दिएको र प्रहरीले पुरी अयोग्य र अनुभवहीन भएकाले किशोरको ज्यान गएको निष्कर्ष निकाल्दै नक्कली डाक्टरको खोजी गरिरहेको बताइएको छ ।