बोर्ड अध्यक्षकी आकांक्षी करिश्मा भन्छिन्- म योग्य पात्र हुँ, कार्ययोजना मुखैमा छ

काठमाडौं । चलचित्र क्षेत्रको नियमनकारी निकाय चलचित्र विकास बोर्डको रिक्त अध्यक्ष पदकी एक आकांक्षी हुन् अभिनेत्री करिश्मा मानन्धर । बोर्ड अध्यक्षका लागि औपचारिक दाबेदारी गर्ने अन्तिम तयारीमा छिन् उनी ।

सूचना तथा सञ्चार मन्त्रालयले गत साउन १६ गते सूचना जारी गर्दै दरखास्त आह्वान गरेको थियो । चलचित्र क्षेत्रमा कम्तीमा १० वर्ष अनुभव प्राप्त गरेकोले १५ दिनभित्र आफ्नो कार्ययोजनासहित आवेदन दिन सक्नेछन् । नायिका मानन्धरले आफ्नो कागजी तयारी लगभग पूरा भएको बताइन् ।

‘पेपरहरू लगभग रेडी भइसकेको छ, एक-दुई दिनभित्र म निवेदन दिन्छु,’ उनले भनिन् ।

चलचित्र क्षेत्रमा आफ्नो लामो योगदान रहेको तथा महिला पनि भएको कारणले गर्दा बोर्ड अध्यक्षमा आफू उपयुक्त पात्र भएको उनको जिकिर छ । विगतमा एक पटक सदस्यको भूमिका निभाइसकेकाले अनुभवको पनि कमी नरहेको उनले बताइन् ।

करिश्मा अहिलेको प्रमुख सत्तारुढ दल नेकपा एमालेमा आवद्ध छिन् । उनलाई एमालेले सांस्कृतिक विभागमा समेटेको छ । उनी २०७२ सालमा बाबुराम भट्टराईको नयाँ शक्तिबाट राजनीतिमा प्रवेश गरेकी थिइन् । २०७८ साल चैत ८ गते उनलाई केपी ओलीले टीका लगाएर पार्टीमा भित्र्याएका थिए । एमालेमा दुई वर्षभन्दा बढी समय व्यतित गर्दा उनले खासै क्षमता देखाउन भने सकिनन् । न त गतिलो भूमिका नै पाइन् । बरु यो बीचमा उनले प्लस २ पास गरेर हाल स्नातक तह अध्ययनरत छिन् ।

अहिले चलचित्र विकास बोर्डको अध्यक्ष बन्ने दौडधुपमा लागेकी छिन् करिश्मा । उनले प्रधानमन्त्री केपी शर्मा ओली र सञ्चारमन्त्री पृथ्वीसुब्बा गुरुङलाई भेटेर आफ्नो इच्छा जाहेर गरिसकेकी छन् । यद्यपि, उनीहरूबाट ठोस आश्वासन प्राप्त भएको छैन ।

बोर्ड अध्यक्षमा करिश्माको आकांक्षा किन त ? उनीसँग गरिएको संक्षिप्त संवादः

– तपाईंले चलचित्र विकास बोर्डको अध्यक्षमा उम्मेदवारी दिन लाग्नुभएको चर्चा छ, कति सत्य हो ?

हो । मैले निवेदन दिने तयार गरिरहेको छु । पेपरहरु अलमस्ट रेडी छ । एक-दुई दिनमा दिन्छु ।

– पार्टी नेतृत्वबाट तपाईंलाई कुनै ‘ग्रीन सिग्नल’ प्राप्त भएको छ कि छैन ?

यो एउटा पोलिटिकल नियुक्ति हो । सरकारी संस्था भएको हुनाले पोलिटिकल नियुक्ति नै हुन्छ होला मेरो विचारमा । नेताहरूले त्यस्तो प्रकारले ‘म गर्छु’ भनेर डाइरेक्ट आश्वासन दिनुहुन्छ जस्तो मलाई लाग्दैन । आफूसँग भएको अनुभव, प्रमाणपत्र, पेपरहरू सबै रेडी गरेर म ‘सबमिट’ गर्छु ।

– किन यो पदका लागि इच्छुक बन्नुभयो त ?

मैले यो क्षेत्रमा नै जीवन बिताएँ । अहिलेसम्म पनि यही क्षेत्रमा समर्पित छु । यसैमा लगाव छ । पार्टीमा आवद्ध हुँदा पनि म कलाकारकै हैसियतमा गएको हो । उहाँहरूले मलाई सांस्कृतिक विभागमा राख्नुभएको छ । बोर्ड नै एउटा संस्था हो जसले नेपाली चलचित्र क्षेत्रको नीतिगतरूपमा कुराहरूमा काम गर्छ । त्यही भएर मैले इच्छा गरेको हुँ । आफ्नो क्षेत्रको थप सेवा गर्न सकुँ भन्ने ध्येय हो ।

– विकास बोर्डमा गएर के काम गर्न सक्छु जस्तो लाग्छ ?

विकास बोर्डलाई हामीले लामो समयदेखि हेरेर आयौं नि त । म २००२ मा नीर दाइ अध्यक्ष हुँदा सदस्य थिएँ । त्यो बेला बोर्ड भर्खर गठन भएको थियो । त्यसअघि एकजना मात्रै अध्यक्ष हुनुभएको थियो । प्लस हामी भाडाको घरमा बस्थ्यौं । बोर्डले अहिले धेरै प्रगति गरेको छ । आफ्नो भवन पनि निर्माण भयो । त्यो बेला अलिकति केटाकेटी थिएँ होला आफू पनि । अहिले आएर चाहीँ परिपक्वता आइसकेको छ । दिदी भन्नुहुन्छ सबैले । सो ह्वाइ नट । चलचित्र क्षेत्रलाई अभिभावकत्व दिन सक्छु होला जस्तो लाग्छ ।

– तर, तपाईं नै हुनुपर्ने थप केही कारण ?

सबै क्षेत्रमा जस्तै चलचित्र क्षेत्रमा पनि महिलाको प्रतिनिधित्व कमै छ । नेतृत्व तहमा त छँदैछैन । चलचित्र सम्बन्धित संघ-संस्था ८-१० वटा छन् । सबैमा प्रायः पुरुष पात्र नै हुनुहुन्छ । मेरो विचारमा महिलाहरु सिन्सियर हुन्छन् हरेक काममा जस्तो लाग्छ ।

चलचित्र क्षेत्रको अहिलेसम्मको उच्च निकाय बोर्ड नै हो । यसमा महिलाले किन पहल नगर्ने त ? हुनु नहुनु सेकेन्डरी कुरा भयो । तर, म यदि त्यसको लायक छु र गर्न सक्छु भने मैले आफ्नो दाबेदारी प्रस्तुत गर्नुपर्छ जस्तो लाग्यो ।

– कत्तिको आशावादी हुनुहुन्छ त ?

म आशावादी छु । म अप्टिमिस्टिक नै मान्छे हुँ । हत्पत्ति निराश हुन्न । म जे कुरा पनि कुर्छु । सँधै सत्यको जित हुन्छ भन्ने विश्वास गर्छु । समाजमा केही गर्छु भनेर निस्क्या मान्छेलाई कहिले राम्रो हुन्छ, कहिले नराम्रो हुन्छ । मलाई पनि भएको छ । जसरी म सिधा हिसाबले सोच्छु, तर सबै चिजहरु सिधा हुँदैन । त्यही भएर मलाई विगतमा अलिकति अप्ठेरोजस्तो पर्यो । किनकी म अलिकति नैतिकतामा विश्वास गर्ने मान्छे पनि हो । यदि मेरो आधारहरु छन् भने त डेफिनेटली मैले पाउँछु नि । त्यो विश्वास छ ।

– सञ्चारमन्त्रीज्यूँसग भेट्नुभएको हो ?

म उहाँलाई शुभकामना दिन भनेर त गएँ । तर, बोर्डकै कुरा चाहीँ मैले गरेको छैन । अहिले त हल्ला भइसक्यो । नेतृत्व तहलाई जानकारी भइसक्यो होला । कसैले पनि सिधै यसरी कुरा गर्नुहुन्छ होला जस्तो मलाई लाग्दैन । मेरो दक्षता र अनुभव नै पर्याप्त छ ।

मैले सिनेमाको हरेक पक्ष बुझेको छु । म कलाकारमात्र होइन, प्रोड्यूसर पनि हुँ । चारवटा फिल्म पनि बनाएँ । लास्ट इयर ‘बगान’ बनाएँ । फिल्म चलाउँदाखेरिको परिश्रम, प्रतिस्पर्धा सबै थाहा छ । सिनेमाको नीतिहरु कस्तो भए हुन्थ्यो भन्ने पनि केही केही थाहा छ । म निर्माता संघमा पनि सदस्य थिएँ । नभ्याएर छोडिदिएँ । समस्या त सबैलाई थाहा हुन्छ । तर, एउटा महिलाको पहल हुँदा राम्रो सन्देश पनि जान्छ । हामी सबै महिलाहरुले आफू सक्षम भए प्रतिस्पर्धामा जानुपर्छ भन्ने सन्देश पनि हो मेरो ।

– आफ्नो कार्ययोजना पनि तयार गरिसक्नुभयो ?

कार्ययोजना मोटामोटी बनाइसकेको छु । अरुले सोचेको भन्दा फरक हुन सक्छ । प्रायः त मुखैमा छ । पेपरमा पनि बनाएको छु । एक/दुई दिनमा । राम्रोसँग फिनिसिङ गरेर दिन्छु । दिन गनिरहेको छु । आज ७ दिन भयो क्यारे ।