विपत्तिको बेला खटिन वडादेखि नै दलीय संयन्त्र बनाउने प्रस्ताव, गृहमन्त्रीले मागे पार्टीका स्वयंसेवक (भिडिओ) – Nepal Press

विपत्तिको बेला खटिन वडादेखि नै दलीय संयन्त्र बनाउने प्रस्ताव, गृहमन्त्रीले मागे पार्टीका स्वयंसेवक (भिडिओ)

काठमाडौं । उपप्रधान तथा गृहमन्त्री रवि लामिछानेले राजनीतिक दलहरूसँग प्राकृतिक विपद्को समयमा स्वयंसेवकको भूमिका गर्ने व्यक्तिहरूको विवरण माग गरेका छन् । गृहमन्त्रालयले आज आयोजना गरेको ‘मनसुनको पूर्वतयारी तथा प्रतिकार्यसम्बन्धी छलफल’ मा तल्लोस्तरसम्म संरचना भएका दलहरूलाई परिचालन गर्ने गरी ‘लुज फोरम’ बनाउन समेत प्रस्ताव गरिएको छ ।

गृहमन्त्री लामिछानेले मनसुनजन्य विपद्‍मा स्वयंसेवकहरूको आवश्यक पर्ने उल्लेख गर्दै दलहरूले आफ्नो तर्फबाट कति स्वयंसेवक दिनसक्छन् सोहीअनुसार मन्त्रालयले योजना बनाउने बताए ।

उनले भने, ‘सम्पूर्ण राजनीतिक दलहरूलाई एउटा प्रस्ताव म के राख्न चाहन्छु भने आउँदै गरेको मनसुनजन्य विपद्का लागि गृह मन्त्रालयले स्वयंसेवकको रुपमा तपाईको राजनीतिक दलबाट कति संख्यामा साथीहरूको अपेक्षा गर्नसक्छौँ होला ? तीमध्ये कति राहत, उद्धारमा अनुभव भएका हुनुहुन्छ होला ? भन्ने कुराको डिटेल यो महिनाको अन्त्यसम्म प्राप्त हुन सक्यो भने हामीले बनाउने योजनामा त्यसको असाध्यै ठूलो भूमिका हुन्छ ।’

२०७२ सालको भूकम्पका बेला पुर्‍याएको योगदानबाट शिक्षा लिँदै दलका नेता/कार्यकर्तामा खोज र उद्धारको कर्तव्यबोध तथा स्वयंमसेवी भावना बढाउन पनि विपद्का बेला उनीहरूलाई प्रयोग गर्नुपर्ने सहभागीको जोड छ ।

नेकपा एसका नेता डा. गंगालाल तुलाधरले सामूहिक भावना र सद्भावको संस्कृति कायम राख्न पनि विपद्का बेला दलहरू एकजुट हुनुपर्ने र उनीहरूको परिचालनका लागि सरकारले आवश्यक निर्देशिका बनाउनु पर्नेमा जोड दिए ।

त्यस्तै, भूकम्प र कोभिडका बेलाको सन्दर्भ जोड्दै नेपाली कांग्रेसका नेता एवं सांसद मोहनबहादुर बस्नेतले तल्लो तहसम्म संरचना रहेका दलका कार्यकर्तालाई ढंग पुर्‍याएर परिचालन गर्न सके तत्काल परिणाम आउने बताए ।

माओवादी केन्द्रका नेता सूर्य सुवेदीले संघदेखि वडासम्म बनाइने ‘लुज फोरम’ ले राजनीतिक दलले नै नेतृत्व गरेका तीनवटै तहका सरकारबीच समन्वय गराउन भूमिका पनि खेल्ने बताए ।

यसैगरी, एमालेका केन्द्रीय सदस्य एवं विपद् व्यवस्थापन तथा स्वयम सेवक विभाग प्रमुख किरण पौडेलले राज्यले विपद् व्यवस्थापनको स्रोत-साधन र दलहरुले जनशक्ति उपलब्ध गराउने अभ्यास प्रभावकारी हुने औंल्याए ।

राप्रपा सांसद ज्ञानबहादुर शाहीले विगतका विपद् प्रभावितको व्यवस्थापनमा ध्यान दिन र जनमत पार्टीका सांसद अब्दुल खानले विपद् व्यवस्थापनको दीर्घकालिन योजना बनाउँदा पनि दलहरुसँग छलफल गर्न सुझाव दिए ।

दलका प्रतिनिधिको सुझावपछि गृहमन्त्री लामिछानले राजनीतिक होस् या प्राकृतिक विपद्‍मा एकजुट हुने नेपालका दलहरूको अभ्यास सकारात्मक रहेको भन्दै जनसेवाको उद्देश्य, तल्लो तहसम्मको संयन्त्र र स्वयमसेवक परिचालनको अनुभवका आधारमा पनि विपद् व्यवस्थापनमा दलहरुको योगदान महत्वपूर्ण हुने अपेक्षा राखे ।


प्रतिक्रिया

Leave a Reply

Your email address will not be published. Required fields are marked *

सम्बन्धित खवर