सरकारी सञ्चारमाध्यमसँग सञ्चारमन्त्री असन्तुष्ट, सिरानीमा सुन राखेर नुन खोज्न हिँडेको टिप्पणी (भिडिओ)

काठमाडौं । सञ्चार तथा सूचना प्रविधिमन्त्री रेखा शर्माले मातहतका निकायको कामकारबाहीप्रति असन्तुष्टि व्यक्त गरेकी छन् ।

बुधवार काठमाडौंमा आयोजित ‘गीतसंगीत र रेडियो नेपाल’ विषयक अन्तरक्रिया कार्यक्रममा बोल्दै उहाँले आफू मातहतका निकाय ‘सिरानीमा सुन राखेर नुन खोज्न हिँड्नेजस्ता’ भएको भन्दै असन्तुष्टि व्यक्त गरेकी हुन् ।

नेपाल सरकारका प्रवक्ता समेत रहेकी मन्त्री शर्माले रेडियो नेपालसहितका सञ्चार मन्त्रालय मातहतका निकायमा सम्पती भएपनि त्यसको सदुपयोग गर्न नसकिएको बताइन् । उनले रेडियो नेपालमा देखिएको समस्या तत्काल समाधान गर्न त्यसका व्यवस्थापनलाई निर्देशन दिइन् । मन्त्री शर्माले पुराना स्रष्टा र सर्जकहरुलाई सम्मान गर्ने कुरामा सरकारले कञ्जुस्याँई गर्न नहुने पनि पटकपटक दोहोर्‍याइन् ।

उनले भनिन्,‘हाम्रा सरकारी सञ्चार माध्यामहरु, निकायहरु, अरु पनि क्षेत्रहरु छन् रेडियो नेपाललाई मात्रै मैले भनिरहेको छैन । हामी सबै कस्ता भयौ भने सिरानीमा सुन राखेर नुन खोज्न हिँड्ने जस्ता हामी भयौं । सम्पती छ । तर सम्पतीलाई प्रयोग गर्न सकेका छैनौ वा हाम्रा केही ऐन, कानूनहरु बाधक छन ? हामीले यसलाई प्रयोग गर्न नसकेर अघि यहाँ भन्नुभयो । तलव खुवाउन पनि हारगुहार गर्नुपर्ने अवस्थामा हामी पुगेका छौं । वास्तवमा यसलाई गहिरो ढंगले समिक्षा गर्न जरुरी छ । म आग्रह गर्न चाहन्छु–रेडियो नेपालका निर्देशकसहितको टिमले समस्याको ठिक ढंगले पहिचान गर्नुस् । हाम्रा यस्ता पाका, पुराना स्रष्टाहरुले यति धेरै गुनासो गर्ने स्थितिमा हामीले पु¥याउनु हँुँदैन । उहाँहरुप्रतिको सम्मान राज्यले गर्न सक्नुपर्छ । त्यो सम्मान गर्ने सामथ्र्य हामीसँग छ भन्ने मलाई लाग्छ । तर हामीसँग सामथ्र्य छ, साधनस्रोत छ । सबै थोक छ । हुँदाहुँदै पनि किन हामीले गर्न सकिरहेका छैनौं ? हाम्रा कानून बाधक हुन भने कानूनी बाटो खोलौं । क्याबिनेटमा लगेर यसको समस्या समाधान गर्न हामी तयार छौं ।’

मन्त्री शर्माले रेडियो नेपालसहितका निकायहरुलाई प्रभावकारी बनाउन कानून बाधक भए सो समस्या समाधान गर्न आफू प्रतिवद्ध रहेको पनि बताइन् । त्यस अवसरमा उनले पुराना स्रष्टा र सर्जकहरुलाई रोयल्टी दिने कुरामा सरकार गम्भिर रहेको समेत बताइन् ।