सामाजिक सुरक्षा कोषको कार्यकारी निर्देशकका लागि ६ जना सर्ट लिस्टमा
उपसमितिले तीनजना सिफारिस गर्ने र सञ्चालक समितिले एकजना नियुक्त गर्ने


काठमाडौं । सामाजिक सुरक्षा कोषको रिक्त रहेको कार्यकारी निर्देशक पदका लागि ६ जना छोटो सूची ‘सर्ट लिष्ट’मा छनौट भएका छन् । कार्यकारी निर्देशकका लागि आवेदन दिएका १२ जनामध्येबाट कार्यकारी निर्देशक छनोट उपसमितिले उनीहरुले पेश गरेको कार्ययोजनाका आधारमा ६ जनाको नाम छोटो सूचीमा छनौट भएको हो ।
छोटो सूची पर्नेमा वैदेशिक रोजगार वोर्डका पूर्व कार्यकारी निर्देशक राजन श्रेष्ठ नेपाल राष्ट्र बैंकका पूर्व कार्यकारी निर्देशक अशोक पौडेल, राष्ट्रिय वाणिज्य बैंकका पूर्व नायव प्रमुख कार्यकारी अधिकृत कविराज अधिकारी, प्राइम बैंकमा शाखा प्रमुखका रुपमा कार्यरत पदमराज पौडेल, बचत तथा ऋण केन्द्रिय संघ (नेफ्स्कुन)का पूर्व प्रमुख कार्यकारी अधिकृत प्रकाशप्रसाद पोखरेल र लिलाराज ढकाल रहेका छन् ।
आवेदन दिएका अन्य ६ जना प्रतिस्पर्धाबाट बाहिरिएका छन् । कार्यकारी निर्देशकका लागि आवेदन दिएकामध्ये नेपाल राष्ट्र बैंकका निर्देशक शहदेव चन्द, युवा तथा साना व्यवसायी स्वरोजगार कोषका कार्यकारी निर्देशक विश्वमोहन अधिकारी, नेपाल स्टक एक्सचेञ्चका पूर्व प्रमुख कार्यकारी अधिकृत चन्द्रसिंह साउँद, आरम्भ लघुवित्तका तत्कालिन प्रमुख कार्यकारी अधिकृत लक्ष्मीप्रसाद शर्मा र सर्पोट माइक्रोफाइनान्सका पूर्व प्रमुख कार्यकारी अधिकृत कुलमणी तिमिल्सिना र जीवन विकास लघुवित्तका पूर्व सहायक महाप्रबन्धक रोहित भण्डारी प्रतिस्पर्धाबाट बाहिरिएका हुन् ।
उपसमितिले छोटो सूचीमा परेकाको प्रस्तुतीकरण र अन्तरवार्ता लिने क्रम बिहीबार सकिएको कोषले जनाएको छ । ६ जनामध्येबाट तीन जनाको नाम उपसमितिले छनोट गरेर सामाजिक सुरक्षा कोष सञ्चालक समितिमा पेश हुनेछ । पेश भएका तीन जना मध्ये उपयुक्त र योग्य एक जनालाई कोष सञ्चालक समितिले ४ वर्षको लागि सामाजिक सुरक्षा कोषको कार्यकारी निर्देशक नियुक्त गर्नेछ ।
रिक्त रहेको कार्यकारी निर्देशकका लागि उपसमितिले गत साउन १६ गते एक सूचना जारी गर्दै कार्यकारी निर्देशक पदमा खुला प्रतिस्पर्धात्मक प्रतियोगिताद्वारा पदपूर्तिका लागि दरखास्त आह्वान गरेको थियो । ५५ वर्ष ननाघेको शैक्षिक योग्यता र अनुभव भएका इच्छुक योग्य नेपाली नागरिकले २१ दिनभित्र आवेदन दिने समय तोकेको थियो ।
अर्थशास्त्र, व्यवस्थापन, श्रम, वाणिज्यशास्त्र वा कानून विषयमा कम्तीमा पनि स्नातकोत्तर उपाधि हासिल गरेको र सरकारी वा गैरसरकारी संघसंस्था वा प्रचलित कानूनबमोजिम स्थापना भएको कम्पनी वा संगठित संस्थाको अधिकृतस्तरको पदमा कम्तीमा १५ वर्षको कार्य अनुभव भएको योग्यता तोकिएको थियो ।
कार्यकारी निर्देशकको नियुक्ति नभएसम्म नेपाल सरकारको राजपत्रांकित प्रथम श्रेणी अर्थात सहसचिवसरहको कुनै अधिकृतलाई श्रम, रोजगार तथा सामाजिक सुरक्षा मन्त्रालयले कार्यकारी निर्देशकको पदमा काम गर्ने गरी तोक्न वा खटाउन सक्ने व्यवस्था अनुसार श्रम, रोजगार तथा सामाजिक सुरक्षा मन्त्रालयले सहसचिव कृष्णप्रसाद ज्ञवालीलाई कोषको कार्यकारी निर्देशकको जिम्मेवारी दिइसकेको छ । हाल उपसमितिको संयोजकका रुपमा कानुन मन्त्रालयका सहसचिव हुमबहादुर केसीले काम गर्दै आएका छन् ।