महानगरका १४ वटा विद्यालयमा कोड क्लव गठन, उपमेयरले गरिन् शितला माविमा शुभारम्भ – Nepal Press

महानगरका १४ वटा विद्यालयमा कोड क्लव गठन, उपमेयरले गरिन् शितला माविमा शुभारम्भ

व्यवहारिक ज्ञान दिएर सफल जीवन जिउने सिप सिकाउँदैछौँ - उपमेयर डंगोल

काठमाडौं । शितला माध्यमिक विद्यालय, बोहोराटार, (काठमाडौँ महानगरपालिका वडा नं। १६) मा आज कोड क्लव गठन भएको छ । बुक फ्रि फ्राइडे कार्यक्रम निरीक्षणका लागि विद्यालय पुग्नुभएकी महानगरपालिकाकी उपमेयर सुनिता डंगोलले क्लव शुभारम्भ गरेकी हुन् ।

क्लबका विद्यार्थीहरू खेल मैदानमा फुटबल खेले जसरी, बास्केटबल र टेवुलटेनिस खेले जसरी रमाउँदै कप्युटरबाट नयाँ कार्यक्रम बनाउँछन् । कोडिङ गर्छन । एनिमेसन गर्छन । साधारण खालका प्रोग्रामिङ गर्छन ।

यसको आधार स्क्याच कोडिङ् हो । यसरी निर्माण गरिएका कार्यक्रमहरू १६० देशका विद्यार्थीको नेटवर्कमा पुग्छ । यही प्लेटफर्मबाट अन्तर्राष्ट्रिय प्रतिस्पर्धा समेत गर्न सकिन्छ ।

कोड क्लब अहिले महानगरका १४ वटा सामुदायिक विद्यालयमा सुरु भइसकेको छन । यसलाई विस्तार गरेर सबै सामुदायिक विद्यालयमा गठन गर्ने योजना छ ।

डिजिटल शिक्षा परिदृश्य उत्थान गर्न, विद्यार्थी र शिक्षकलाई नविनतम प्राविधिक उपकरणसँग अभ्यस्त बनाउन महानगरले डिजिटल एण्ड वियोण्डसँगको सहकार्यमा प्रविधि विस्तार गरिरहेको छ । यस कार्यक्रमका लक्षित विद्यार्थी कक्षा ४ देखि ९ सम्मका हुन् । क्लबका क्रियाकलापमा सम्लग्न बालबालिकामा शैक्षिक तथा सोच विकास र आलोचनात्मक बिचार निर्माणमा सघाउ पुग्नेछ । सञ्चालित कार्यक्रमको नतिजाका विषयमा महानगरका प्रमुख बालेन्द्र शाह (बालेन) को धारणा छ ।

क्लवका विद्यार्थीहरुले विद्यालयको आफ्नै वेभसाइट निर्माण गर्न सक्छन् । यसबाट विद्यालयको परिचय विश्व सामु पुग्नेछ ।
अहिले सामुदायिक विद्यालयका शिक्षकहरूमा डिजिटल साक्षरता बढेको छ । यस्तै गुगल वर्क स्पेसमा शैक्षिक क्रियाकलाप तथा शिक्षण सिकाइ प्रक्रिया थालिएका छन् ।

शुक्रबारको निरीक्षणमा उपमेयर डंगोलसहित प्रमुख प्रशासकीय अधिकृत बसन्त अधिकारी, शिक्षा सल्लाहकार रेशु अर्याल, शिक्षा विभागका प्रमुख सीताराम कोइरालासहित अधिकारी सहभागी थिए । शितलासहित अहिलेसम्म १४ वटा सामुदायिक विद्यालयमा कोड क्लव गठन भइसकेको छ ।

यस विद्यालयमा शिक्षामा सिप कार्यक्रमअन्तर्गत सौन्दर्य कला र हेयर स्टाइल (कपाल शैली) सिकाइ भइरहेको छ । सौन्दर्य कला सम्बन्धी कार्यक्रममा छात्रछात्रा दुवै सहभागी भएकाले विद्यार्थीहरुमा बृहत्तर बुझाइ हुने प्रमुख शाहले अपेक्षा व्यक्त गर्नुभएको छ । विद्यालयमा बुक फ्रि फ्राइडे अन्तर्गत स्काउट, नेपाल भाषामा सङ्गीत लगायत सिकाइ हुने गरेको छ ।

तरुण माध्यमिक विद्यालयमा आज बुक फ्रि फ्राइडे अन्तर्गत नेपाल भाषाको संगीत, चित्रकला, हाजिरी जवाफ प्रतियोगिता सम्पन्न भए । यहाँ सिपमूलक तालिमअन्तर्गत मोवाइल र विद्युतीय सामग्री मर्मत गर्ने, कृषि तथा सहरी खेती र पाक कलाको कक्षा भइरहेको छ ।

निरीक्षणपछि उपप्रमुख डंगोलले,’प्रतिस्पर्धी जमानाका लागि व्यवहारिक शिक्षाको आवश्यकता पूरा गराउन नयाँ सिकाइ पद्धति कार्यान्वयनमा ल्याइएको बताइन्। बालबालिकालाई किताबमा सीमित गराइयो भने विद्यार्थीहरुलाई शिक्षाको वृहत्तर आकृति देखाउन सकिँदैन । यसबाट बाहिर आउन बुक फ्रि फ्राइडे लाभदायी हुनेछ ।Ú उपमेयरले अपेक्षा गरिन् ।

कार्यक्रम सञ्चालनपछि प्राप्त प्रतिक्रियाबाट महानगर कार्यक्रमको नियमितताका लागि उत्साहित भएको प्रमुख प्रशासकीय अधिकृत अधिकारीको भनाइ छ ।

शिक्षा विभागका प्रमुख, शिक्षा अधिकृतहरु, विद्यालय निरीक्षकहरुको टोलीले ज्ञान रश्मी माध्यमिक विद्यालय, महेन्द्र बौद्ध मा वि, बौद्ध, नवजागृति माध्यमिक विद्यालय, बाँसबारी मा वि, महेन्द्र राष्ट्रिय मा विर धुम्रबराह मावि को निरीक्षण गरिएको छ । यसैगरी बाल सेवा मा वी झोःछेँ, नवआदर्श मावि बसन्तपुर, शान्ति निकुञ्ञ मावि को निरीक्षण गरेका छन् ।

यस्तै सञ्चार विभागबाट पत्रकार/सञ्चारकर्मीहरुले रत्नराज्य मा वि, शारदा मा वि लगायत विद्यालयको निरीक्षण गरेका छन् । निरीक्षणका क्रममा बुक फ्रि फ्राइडे अन्तर्गत हुने गरेका क्रियाकलाप, यस्ता क्रियाकलापमा विद्यार्थीहरुको रुचि, सिपमुलक तालिम सञ्चालन विधिलगायत पक्ष हेर्ने गरिएको छ ।

शिक्षा अधिकारी सीताराम कोइरालाका अनुसार आउँदो शुक्रबारभित्र सिपमुलक कार्यक्रम सञ्चालन भएका सबै विद्यालयको निरीक्षण गरिसक्ने योजना रहेको बताए ।


प्रतिक्रिया

Leave a Reply

Your email address will not be published. Required fields are marked *

सम्बन्धित खवर