सूर्यकुमारलाई पनि बिर्साए पाकिस्तानी ब्याट्सम्यान सफिकले, लगातार चार म्याचमा डकआउट

काठमाडौं । लगातार तीन खेलमा गोल्डेन डकआउट भएर भर्खरै लज्जास्पद रेकर्ड बनाएका थिए भारतीय स्टार ब्याट्सम्यान सुर्यकुमार यादवले । तर, उनको प्रदर्शनलाई पनि मात दिने गरी पाकिस्तानी ब्याट्सम्यान अब्दुलाह सफिकले विश्वरेकर्ड नै बनाएका छन् ।

सुर्यकुमारलाई बिर्साउने सफिक पाकिस्तानका टप अर्डर ब्याट्सम्यान हुन् । अहिले पाकिस्तानले अफगानिस्तानविरुद्ध टि–२० सिरिज खेलिरहेको छ । तीनवटा म्याचको सिरिजमा लगातार पहिलो दुई म्याच जित्दै अफगानिस्तानले सिरिज कब्जा गरिसक्यो । अन्तर्राष्ट्रिय क्रिकेटमा पाकिस्तानलाई अफगानिस्तानले हराएको पहिलोपटक हो ।

अफगानिस्तानविरुद्धका दुवै म्याचमा पाकिस्तानका ब्याट्सम्यानले कमजोर प्रदर्शन गरे । खासगरी टप अर्डरका ब्याट्सम्यान चल्न नसक्दा पाकिस्तानमाथि अफगानिस्तान हावी भएको छ ।

दुवै म्याचमा सबैभन्दा बिर्सनलायक प्रदर्शन चाहिँ अब्दुल्लाहकै थियो । तेस्रो नम्बरमा ब्याटिङ गरेका उनी दुई खेलमा लगातार शून्यमा आउट भए । पहिलो खेलमा दुई बल सामना गरेका अब्दुल्लाह दोस्रोमा गोल्डेन डक आउट भएका हुन् ।

अब्दुल्लाह शून्यमा आउट भएको यो लगातार चौंथोपटक हो । यसअघि उनले न्यूजिल्यान्ड विरुद्ध खेल्दा दुईपटक शून्यमा आउट भएका थिए । उनले कुनै पनि अन्तर्राष्ट्रिय क्रिकेटमा लगातार चारपटक शून्यमा आउट हुने विश्वकिर्तिमान बनाएका छन् ।

२३ वर्षिय अब्दुल्लाह मुलत टेस्ट ब्याट्सम्यान हुन् । टेस्ट क्रिकेटमा उनले अहिलेसम्म १२ म्याच खेल्दा ९९२ रन बनाइसकेका छन् । तर, टि–२० मा उनले पाँच खेल खेल्दा चारवटामा शून्यमा आउट भएका हुन् । पहिलो टि–२० मा भने उनले नटआउट ४१ रन बनाएका थिए ।