मेस्सीको अभूतपूर्व सफलता र सन्निकट दिग्विजय

अर्जेन्टाइन स्टार स्ट्राइकर लियोनेल मेस्सी आफ्नो खेल जीवनको उत्तरार्धमा छन् । अन्तर्राष्ट्रिय फुटबल करियरबाट विश्राम लिनु पूर्व कतार विश्वकपमा मेस्सीको प्रदर्शन अहिलेसम्मकै उत्कृष्ट विश्वकप प्रदर्शन हो भन्दा अन्यथा हुनेछैन, त्यो पनि ३५ वर्षको बढ्दो उमेरमा ! आफ्नो करिअरको अन्तिम विश्वकप खेलिरहेका मेस्सी जति दबाबमा छन्, त्यति नै दुनियाँभरका फुटबल प्रेमीहरूको समर्थन र प्रशंसा पाइरहेका छन् । एकजना खेलाडीका लागि सफलता र सद्भावको धेरै ठूलो अर्थ र मूल्य हुन्छ, जुन मेस्सीले प्राप्त गरिसकेका छन्, गरिरहनेछन् !

विश्व विजेता बनेर संसारलाई हाँक दिने मृगतृष्णा बोकेर मेस्सी-अर्जेन्टिनी समर्थक बाँचेको पनि आज ३८ वर्ष भएको छ । आफ्नै नायकत्वमा करिअरको अन्तिम विश्वकपको अन्तिम खेल खेल्न मैदा प्रवेश गर्न लागेका मेस्सीसँग विश्वस्तरको डिफेन्ससहित युवा खेलाडी, अनुभवी सहकर्मी, पेनाल्टी विज्ञ गोलकिपरको साथ छ । र, त्यसलाई साथ दिइरहेका मुख्य तीनवटा पक्ष छन्, उत्कृष्ट प्रशिक्षक, एकताबद्ध टोली र आत्मविश्वास सहितको जितको भोक । मेस्सीको अर्जेन्टिनालाई रोकेर विश्वकप जित्न फ्रान्सेली टोलीलाई कठिन मात्रै होइन नै असम्भव जस्तै छ ।

यो स्मरण छ कि मेस्सी अर्जेन्टिनालाई विश्व विजेता बनाउने यात्राको धेरै नजिक पुगेका थिए, तर, त्यसमा युरोपेली टिम जर्मन भिलेन बन्यो र सन् २०१४ मा अर्जेन्टिना विश्व विजेता बन्नबाट धेरै नजिक पुगेरपनि वञ्चित हुनुपर्‍यो । विश्व विजेता, त्यो पनि आधुनिक फुटबलको, यो सजिलो कुरा भने पक्कै होइन ! कठोर लडाइँ पछिको दिग्विजयी हासिल गर्न अहिलेको अर्जेन्टिना सबल छ, योग्य छ ! उसका पछिल्ला ४२ मध्ये १ खेल मात्रै हारेको छ । ब्राजिल, इटाली, नेदरल्यान्डस्, क्रोएसिया, पोल्यान्ड र मेक्सीको जस्ता बलिया टोलीमाथि अर्जेन्टिना हावी हुँदै आएको छ । यो तथ्यले अर्जेन्टिना फ्रान्स भन्दा पनि राम्रो र विश्व विजेता बन्न लायक टिम हो भन्नेमा दुबिधा हुनेछैन ।

सातौँ पटकका बालोन डि’ओर विजेता, सातै पटकका फिफा वर्ष खेलाडी, ६ पटकका युरोपियन गोल्डेन बुट बिजेता, ४ पटकको च्याम्पियनसिप लिग विजेता र अन्तर्राष्ट्रिय उपाधि तर्फ कोपा अमेरिका र कमनबेल यूईएफए कप च्याम्पियनसीप विजेता मेसीले सब थोक जितेका छन् !

बार्सिलोनाबाट मात्रै ३५ बढी उपाधी विजेता मेस्सीले फुटबलमा जित्न बाँकी नै केही छैन, बाहेक फिफा विश्वकप ! आफ्नै कप्तानी र मुख्य प्रदर्शनमा उत्कृष्ट व्यक्तिगत तथ्यांक सहित कतार विश्वकपको फाइनलमा पुगेका मेस्सी २२ औं संस्करणको अरब विश्वकप जितेर आफूलाई Greatest Of All Time, अर्थात् GOAT प्रमाणित गर्न चाहन्छन् । शताब्दी फुटबलरको उत्कृष्ट पहिचान सहित आजीवन आफूमाथिको दबाब र आलोचनालाई साम्य पार्दै आफ्नो विशिष्ट खेल यात्राको ग्रेटफुल एक्जिट गर्न उद्धत मेस्सी आठौं पटकको बालोन डिओर अवार्डका समेत एक्ला हकदार बन्नेछन् ।

४ वर्षे उमेरदेखि फुटबल खेल्न सुरु गरेका मेस्सी १३ वर्षको उमेरमा स्पेनिस क्लब बार्सिलोनामा अनुबन्ध भएका थिए । झन्डै १७ वर्ष बार्सिलोनाबाट व्यावसायिक फुटबल खेलेका मेस्सीले ३५ वटा उपाधि हात पारे । अघिल्लो सिजन, अर्थात् सन् २०२१ मा फ्रान्सेली क्लब पिएसजी पुगेका मेस्सीले पहिलो सिजन नै लिग वानका विजेता बन्न सफल भए ।

तथ्याङ्कमा हेर्दा मेस्सी साँच्चिकै असाधारण छन्, अविश्वसनीय छन् ! जारी विश्वकपको सेमिफाइनलमा क्रोएसियासँगको खेलसँगै मेस्सीले आफ्नो १००२ औँ खेलको आँकडा पुरा गरेका छन् । त्यस क्रममा उनले ७९१ गोल सहित ३४० गोलका लागि अवसर सिर्जना गर्न सफल छन् । ३५ वर्षीय स्टार स्ट्राइकर मेस्सीले यी सबै सफलता र कीर्तिमान आफ्नो उत्कृष्ट खेल शैली र असाधारण क्षमताले सम्भव भएको हो ।त्यसैले त उनी संसारभर जादुयी, अर्थात् म्याजिक मेस्सीको उपनामले विख्यात छन् ।

१८ वर्षको उमेरमा हंगेरीविरुद्धको खेलमा राष्ट्रिय टोलीबाट डेव्यू गरेका सुपरस्टारको नाममा ९६ गोलको रेकर्ड कायम छ । जारी विश्वकपमा साउदी विरुद्ध पेनाल्टीमा पहिलो गोल गरेका मेस्सीले फाइनल खेलसम्म आउँदा ६ खेलबाट ५ गोल र तीन असिस्ट पुरा गरिसकेका छन् । सन् २००६ को विश्वकपदेखि सुरु भएको उनको यो ५ औँ संस्करण विश्वकप हो । अन्तिम विश्वकपका लागि अर्जेन्टिनाबाट खेलिरहेका मेस्सीले सर्वाधिक ११ गोलको कीर्तिमान कायम गरेका छन् । उनी यसपटकको विश्वकप फुटबलमा गोल्डेन बुटका प्रमुख दाबेदार पनि हुन् !

फुटबलमा हरेक सफलताको स्वाद चाखेका मेस्सीलाई विश्वकपको भोकले कहिल्यै छाडेन । मैले अगाडि पनि उल्लेख गरेँ कि मेस्सी ब्राजिलमा जारी विश्वकपको धेरै नजिक पुगेर पराजित हुनुपर्‍यो । त्यसबाट मेस्सीले यतिधेरै आलोचना र अपमान हुनुपर्‍यो कि मेस्सीले आफ्नै देशका समर्थकबाट आफ्नो जर्सीमा आगो लगाइएको हेर्नुपर्‍यो । उनको पुत्ला जलाइयो । त्यसबाट विक्षिप्त हुँदै फुटबलबाट संन्यासको घोषणा नै गरे । तर, अर्जेन्टिनाका तत्कालीन राष्ट्रप्रमुखदेखि संसारभरका फुटबल प्रेमीको सद्भाव र दबाबले उनलाई पुनः राष्ट्रिय टिममा फर्किन बाध्य पार्‍यो । हुनसक्छ, उनले आफ्नो अन्तिम विश्वकप अरब विश्वकप जित्नकै लागि उनी फुटबलमा फर्किएका त थिएनन् ? एउटा सिंगो रातको प्रतीक्षापछि यो कुरा थप पुष्टि हुनेछ !

अतः अनेकौँ सफलता र कीर्तिमानले सुसज्जित मेस्सीको फुटबल करिअर साँच्चिकै असाधारण छ । तर, अन्तर्राष्ट्रिय करिअर भने अपेक्षित राम्रो हुन नसकेको साँचो हो । अघिल्लो वर्ष ब्राजिललाई उसकै भूमिमा हराएर दक्षिण अमेरिकी क्षेत्रको सबैभन्दा ठूलो र प्रतिष्ठित प्रतियोगिता कोपा अमेरिका जित्यो । मेस्सीको मुख्य प्रदर्शन र कप्तानीमा अर्जेन्टिनालाई २८ वर्षदेखिको उपाधि विहीन यात्रामा पूर्णविराम लगाउँदै मेस्सीलाई समेत अन्तर्राष्ट्रिय उपाधि दिलायो । त्यही खेल, त्यही उपाधिको ऊर्जामा टेकेर अर्जेन्टिना विश्व विजेता बन्ने सपनालाई पुनर्जीवित गर्‍यो । र, आज त्यही ऊर्जा र प्रेरणाले अर्जेन्टिनालाई विश्वविजेताको सफलता नजिक पुर्‍याएको छ ।

र, अरबमा मात्रै होइन, आज दुनियाँ नै मेस्सीमय बनेको छ । अर्जेन्टिनालाई ३६ वर्षपछि पुनः विश्व विजेता बनाएर फुटबल जगतमा पेले र म्याराडोनाको भन्दा फराकिलो पहिचान बनाउने ऐतिहासिक अवसर मेस्सीले जुनसुकै मूल्यमा पनि खेर फाल्न चाहँदैनन् । यसका अघि फ्रान्सेली टिम निष्प्रभावी हुने निश्चित जस्तै छ । अन्तर्राष्ट्रिय फुटबल करिअरको अन्त्यको एक कदम मात्रै बाँकी रहँदा आधा धर्ती मेस्सीको ग्रेटफुल एक्जिटका लागि प्रार्थना गरिरहेको छ !