रवीन्द्र मिश्रको चुनाव खर्च साढे २४ लाख, उब्रिएको साढे ८ लाख काठमाडौं–१ कोषमा

काठमाडौं । काठमाडौंको क्षेत्र नम्बर १ बाट पराजित राप्रपा उम्मेदवार रवीन्द्र मिश्रले निर्वाचन आयोगमा आफ्नो चुनावी खर्च विवरण बुझाएका छन् ।

मिश्रका अनुसार प्रतिनिधि सभाको चुनाव लड्दा उनको साढे २४ लाख खर्च भएको छ । निर्वाचन आयोगले दिएको सीमा (२५ लाख) भित्र रहेर मिश्रले आफ्नो चुनावी अभियान सम्पन्न गरेका हुन् । उनले चुनाव लड्ने क्रममा सहयोगका लागि अपिलसमेत गरेका थिए ।

शुभेच्छुकहरूबाट आफूलाई लगभग ३३ लाख रुपैयाँ सहयोग प्राप्त भएको मिश्रले जानकारी दिए । त्यसमध्येबाट २४ लाख ४९ हजार ६०७ रुपैयाँ चुनावमा खर्च भएको हो भने करिब साढे ८ रुपैयाँ उब्रेको छ ।

उब्रेको पैसा आफूले ‘काठमाडौं–१ सरोकार कोष’ मा राख्ने मिश्रले बताएका छन् । चुनावमा पराजित भएपश्चात् उनले काठमाडौं १ मा विभिन्न काम गर्ने भन्दै कोष निर्माण गर्ने घोषणा गरेका थिए ।

मिश्रले अघिल्लो २०७४ सालको चुनावमा २१ लाख ५० हजार खर्च गरेका थिए । उक्त चुनावमा पनि प्राप्त सहयोगबाट उब्रेको रकम पार्टीलाई बुझाएका थिए ।