मकवानपुरबाट दीपक सिंह भन्छन्- राप्रपा सरकारमा जाँदैन (भिडिओ)

हेटौँडा । नवनिर्वाचित प्रतिनिधिसभा सदस्य दीपकबहादुर सिंहले राष्ट्रिय प्रजातन्त्र पार्टी (राप्रपा) अब निर्माण हुने सरकारमा जान नहुने र नजाने बताएका छन्।

आफूहरु अहिले प्रतिपक्षमा बसेर खबरदारी गर्नुपर्ने भन्दै उनले राम्रो सरकार बनेदेखि बाहिरै बसेर सरकारको समर्थन गर्न सकिने उनको भनाई छ ।

राप्रपाका केही पुराना नेताहरुले राप्रपा भनेकै सरकारमा जानको लागि स्थापना भएको पार्टी भएको भान जनतामा पारिदिएको भन्दै सिंहले अबको राप्रपा त्यस्तोखाले राप्रपा नभएको बताए ।

उनले भने, ‘सरकारमा राप्रपाको कसैलाई जरुरी भयो, राप्रपाको मुल्य मान्यतासँग मेल खाने कुरा आयो भने हामीले उहाँहरुलाई सरकार बाहिरैबाट समर्थन गर्नेछौ, तर हामी तुरुन्तै सरकारमा जाँदैनौ, हामीलाई यति सिट चाहियो, उति चाहियो, यो भन्त्रालय चाहियो भनिकन सरकारमा जाँदैनौ ।’

सिंहले इमानन्दारीको साथमा विकासको सन्दर्भमा जुनसुकै सरकारसँग सहकार्य गरेर काम गर्न तयार रहेको बताए । सिंहले सरकारमा जानु मात्र राजनीति नभएको भन्दै आफूँहरुले इमान्दारिताको राजनीतिलाई अघि बढाएको दाबी गरे ।

मकवानपुरको विकास र देशमा भ्रष्ट्राचार कम गर्ने सबालमा आफुले महत्वपूर्ण भूमिका निर्वाह गर्ने बताउँदै सिंहले सरकार आफुँहरुको प्राथमिकतामा नरहेको दाबी गरे ।