अहिलेसम्म प्रदेश सभाका ४१ निर्वाचन क्षेत्रमा माओवादी केन्द्रका उम्मेदवार निर्वाचित (सूचीसहित)

काठमाडौं । प्रदेश सभाका प्रत्यक्षतर्फ ३३० वटा निर्वाचन क्षेत्रमा सम्पन्न प्रदेश सभाको निर्वाचनमा अहिलेसम्म नेकपा (माओबादी केन्द्र)का ४१ जना उम्मेदवार निर्वाचित भएका छन् । निर्वाचन आयोगले अहिलेसम्म सार्वजनिक गरेको प्रदेश सभाको प्रत्यक्षतर्फको नतिजा अनुसार माओवादी केन्द्रका ४१ जना उम्मेदवार निर्वाचित भएका हुन् ।

जसमा अहिलेसम्म प्रदेश एकमा ६ जना, मधेश प्रदेशमा ४ जना, बागमती प्रदेशमा ९ जना, गण्डकी प्रदेशमा ३ जना, लुम्बिनी प्रदेशमा ४ जना, कर्णाली प्रदेशमा ७ जना र सुदूरपश्चिम प्रदेशमा ८ जना निर्वाचित भएका छन् ।

सत्तारुढ बाम लोकतान्त्रिक गठबन्धन र केहि क्षेत्रमा एकल गरेर माओवादी केन्द्रले प्रदेश सभाका ११२ वटा निर्वाचन क्षेत्रमा उम्मेदवारी दिएको थियो । जसमा बागमती प्रदेशमा सबैभन्दा धेरै २४ वटा निर्वाचन क्षेत्रमा उम्मेदवार उठाएको छ भने सबैभन्दा कम कर्णाली प्रदेशमा १० वटा निर्वाचन क्षेत्रमा मात्रै उम्मेदवार उठाएको थियो ।

यस्तै प्रदेश नम्बर एकका १९, लुम्बिनी प्रदेशमा १८, मधेश प्रदेशमा १७, गण्डकी प्रदेशका १२, सुदूरपश्चिम प्रदेशका १२ र कर्णाली प्रदेशमा १० वटा निर्वाचन क्षेत्रमा उम्मेदवारी दिएको थियो ।