पूर्व राज्यमन्त्री शत्रुधन सिंहले जसपा छाडे, एमाले प्रवेशका लागि छलफल – Nepal Press

पूर्व राज्यमन्त्री शत्रुधन सिंहले जसपा छाडे, एमाले प्रवेशका लागि छलफल

काठमाडौं । जनता समाजवादी पार्टीका नेता तथा पूर्व राज्यमन्त्री शत्रुधन प्रसाद सिंहले जसपा परित्याग गरेका छन् । अध्यक्ष उपेन्द्र यादवलाई सम्बोधन गर्दै उनले पार्टी परित्याग गरेको पत्र पठाएका हुन् ।

सिंहको नाम सिरहा क्षेत्र नम्बर २ बाट प्रतिनिधि सभा सदस्यमा सिफारिस भएको थियो । सोही क्षेत्रबाट अध्यक्ष उपेन्द्र यादव र प्रदेश अध्यक्ष विजय यादवको पनि नाम सिफारिस भएको थियो ।

पार्टीले सो क्षेत्रमा आफूलाई टिकट नदिने बुझेपछि सिंहले जसपा परित्याग गरेको बताइएको छ । उनी पहिलो संविधानसभामा सोही क्षेत्रबाट निर्वाचित भएका थिए भने २०७४ सालमा वाम गठबन्धनका सुरेशचन्द्र दाससँग पराजित भएका थिए ।

उनले पत्रमा लेखेका छन्, ‘पार्टीको सबै तह र साधारण सदस्य समेत आजैको मितिबाट लागु हुनेगरी परित्याग गरेको जानकारी गराउँदछु ‌।’ ५ दलिय गठबन्धनको नाउमा पार्टीले मधेशी जनताको भावना विपरित मधेशको अस्तित्व नै धरापमा पार्ने कार्यहरु गरेको उनले आरोप लगाएका छन् ।

लामो संघर्षपछि बचाइराखेको पार्टीको आस्था र भावना विपरित कार्यकर्ता मन मष्तिस्कमा पुर्‍याएको चोट सहन गर्न नसकी जसपा परित्याग गरेको उनले उल्लेख गरेका छन् ।

को हुन् सिंह ?

सिंह ०६३/०६४ देखि मधेस आन्दोलनमा सक्रिय भूमिका खेलेका हुन् । उनी पहिलो पटक तत्कालीन मधेसी जनअधिकार फोरमबाट पहिलो संविधान सभा सदस्यमा तत्कालीन सिरहा क्षेत्र नम्वर ४ मा निर्वाचित भएका थिए । उपेन्द्र यादव नेतृत्वको फोरम विभाजन हुँदा सिंह विजय गच्छेदार नेतृत्वको तत्कालीन मधेसी जनअधिकार फोरम (लोकतान्त्रिक)मा गएपछि पर्यटन राज्यमन्त्री बन्न सफल भएका थिए ।

दोस्रो संविधानसभा सदस्यमा फोरम लोकतान्त्रिकबाटै सिंहले सिरहा ४ मै चुनाव लडेका थिए । तर पराजित व्यहोरे । फोरम लोकतान्त्रिक नेपाली कांग्रेसमा समाहित भएपछि उनी पुनः उपेन्द्र यादवको पार्टी रोजे ।

०७४ को चुनावमा उनले संघीय समाजवादी फोरमबाट अहिलेको सिरहा क्षेत्र नम्वर २ मा चुनाव लडेपनि पुनः पराजित भए । सिंह यो पटक पनि चुनाव लड्ने तयारीमा छन् । तर सत्ता गठबन्धनको सिट बाँडफाँटमा सिरहा क्षेत्र नम्वर २ कांग्रेसको भागमा पर्ने लगभग निश्चित भएपछि उनी जसपा परित्याग गरेको बुझिएको छ ।

स्रोतका अनुसार सिंह नेकपा एमालेमा प्रवेश गर्न जसपा परित्याग गरेका हुन् । एमालेमा प्रवेश गरी सिरहा क्षेत्र नम्वर २ बाट उम्मेदवारी दिने बुझिएको छ । उनी एमाले नेताहरुसंग पटक पटक छलफल गरिसकेका छन् ।

 

प्रतिक्रिया

One thought on “पूर्व राज्यमन्त्री शत्रुधन सिंहले जसपा छाडे, एमाले प्रवेशका लागि छलफल

  1. जसपाले टिकट नदिनेबितिक्कै एमाले प्रवेश ? अनि एमालेले चाहिँ टिकट दिईहाल्नुपर्ने ? वर्षौं पार्टीमा योगदान गरेकाहरूलाई पन्छाएर नव प्रवेशीलाई टिकट दिने भए अरू एमालेमा किन बस्ने? त्यसैले अहिले प्रवेश गरेकालाई उनीहरूको पार्टीप्रतिको निष्ठा मूल्याँकन गरेर उचित भए अर्को चुनावसम्ममा दिन सकिन्छ । अरू पार्टीले टिकट नदिने बितिक्कै एमाले, गठबन्धनले हेप्ने बितिक्कै एमाले । यसरी पाए अन्त नपाए जोइर्या जन्त हुन एमाले त्यति सस्तो पार्टी हो ? नेतृत्वले विचार गरोस ।

Leave a Reply

Your email address will not be published. Required fields are marked *

सम्बन्धित खवर