प्रचण्डसँग ‘लभ एण्ड हेट’ को सम्बन्धले कान्छाबहादुरलाई जुरेको महासचिव पद
२०७९ भदौ ४ गते १६:३६
काठमाडौं । पदाधिकारी चयनको निकै रस्साकस्सीपछि अन्ततः देव गुरुङ नेकपा माओवादी केन्द्रको महासचिव बनेका छन् ।
राष्ट्रिय महाधिवेशन सकिएको ८ महिनासम्म माओवादीले पदाधिकारी टुंगो लगाउन सकेको थिएन । वर्षमान पुन र जनार्दन शर्माको सशक्त दाबेदारीका कारण महासचिव चयनमा अध्यक्ष पुष्पकमल दाहाल ‘प्रचण्ड’लाई सकस परिरहेको थियो । त्यही भएर शर्मा र पुन दुवैलाई उपमहासचिवमा राखेर प्रचण्डले तेस्रो विकल्पको रूपमा गुरुङलाई अघि सारेका छन् ।
गुरुङको जन्म मनाङ नासोङ गाउँपालिका ४ मा भएको हो । २०३८ सालमा नेकपा मसालको केन्द्रीय सदस्य हुँदै उनी २०४० मा अखिल आठौंको केन्द्रीय अध्यक्ष बनेका थिए ।
२०४७ सालको पार्टी एकतापछि गुरुङ नेकपा एकता केन्द्रको केन्द्रीय सदस्य बने त्यसपछि २०४८ मा उनी ‘एक वाम एक ठाम’ को नारा लिएर लमजुङ १ मा संयुक्त जनमोर्चाबाट चुनाव लडेका थिए ।
गुरुङले २०५३ देखि ४ वर्ष जेलजीवन बिताए । भूमिगत कालमा उनी २०६१ सालमा स्थायी समिति सदस्य, २०६२ मा नेकपा माओवादीको तर्फबाट सरकारसँग दोस्रो वार्ताटोलीको सदस्यको जिम्मेवारीमा रहे । जनयुद्धकालमा उनको नाम कान्छाबहादुर थियो । उनी पहिलो वार्ताकालमा माओवादीबाट वार्ता टोली सदस्य पनि थिए ।
माओवादी शान्ति प्रक्रियामा आएसँगै २०६४ मा उनी अन्तरिम संसदको सदस्य तथा संसदीय दलको उपनेता बने भने २०६४ मै स्थानीय विकास मन्त्री भएर एक वर्ष काम गरे । पहिलो संविधानसभा चुनावमा गुरुङ कास्की १ बाट निर्वाचित भए । उनी २०६५ मा कानुन तथा न्यायमन्त्री भएका थिए ।
२०६६ देखि दुई वर्ष संसदीय दल प्रमुख सचेतक रहेका गुरुङ पार्टी विभाजनमा मोहन वैद्यलाई साथ दिएर हिँडे ।
वैद्य नेतृत्वको माओवादीमा रहँदा उनीहरूले २०७० को संविधानसभा निर्वाचन बहिष्कार गरे । पछि पुनः एकीकृत माओवादीमा फर्किएर २०७४ को संसदीय चुनावमा वामगठबन्धनबाट उम्मेदवार बनेका गुरुङ नेपाली कांग्रेसका नेता दीलबहादुर घर्तीलाई हराउँदै लमजुङबाट विजयी बने ।
एमाले-माओवादी एकतापश्चात नेकपाकालमा उनी संसदीय दलको प्रमुख सचेतक बने । हाल माओवादीबाट गुरुङ प्रमुख सचेतक छन् ।
माओवादीभित्र वैचारिक नेताकारुपमा लिइने गुरुङले स्नातकोत्तरसम्म अध्ययन गरेका छन् । माओवादीभित्रको अन्तरसंघर्षमा भने देव गुरुङ अधिकांश बेला प्रचण्डको विपक्षमा उभिए । उनले मोहन वैद्य किरणलाई साथ दिने गरेका थिए ।
कृष्णबहादुर महरा र देव गुरुङ दुवैजना वैद्यका भरोसायोग्य पात्र थिए । तर २०६९ मा पार्टी विभाजन हुँदा महराले वैद्यलाई साथ दिएनन् । माओवादीमा फर्किएपछि पनि बादल समूहका रुपमा देव गुरुङहरु थिए । तर, पछिल्लो नेकपाकालमा भने उनी प्रचण्डको पक्षमा दह्रिलोसाथ उभिए ।
संसदीय दलका नेता केपी शर्मा ओलीले उनलाई प्रमुख सचेतक समेत बनाउन मानेका थिएनन् । तर, प्रचण्डको कोटाबाट परेका थिए । यसपटक पनि प्रचण्डले पार्टीभित्र सन्तुलन मिलाउन अनपेक्षित रुपमा उनको नाम महासचिवमा प्रस्ताव गरे ।
प्रकाशित: २०७९ भदौ ४ गते १६:३६
प्रतिक्रिया
2 thoughts on “प्रचण्डसँग ‘लभ एण्ड हेट’ को सम्बन्धले कान्छाबहादुरलाई जुरेको महासचिव पद”
Leave a Reply to bharat kumar Thapa Cancel reply
सम्बन्धित खवर
चरम अवसरवादी हो देव गुरूङ। प्रचण्डसँग दलाली गर्न एमसिसि, नागरिकता विधेयकको विरोध गर्यो पछि त्यहि प्रचण्डको पाउमा पर्यो। पिंध नभएको लोटा ।
चरम अवसरवादी माओवादी नेता देव गुरूङ कम्युनिस्ट र राष्ट्रवादी राजनैनिकआन्दोलनमा इतिहासमा दोहोरो चरित्रका पात्र हुन आफ्नो फाइदाका लागि छिनछिनमा परिवर्तन भै रहने पुष्प कमल दाहाल र देव गुरूङ उस्तै पात्र हुन।