गठबन्धनको सत्तास्वार्थ र एमालेका चुनौती – Nepal Press
ब्लग

गठबन्धनको सत्तास्वार्थ र एमालेका चुनौती

अहिले देशको राजनीति प्रस्ट दुई ध्रुवमा ध्रुवीकृत छ । एकातिर प्रमुख प्रतिपक्षी दल नेकपा एमाले छ भने अर्कोतिर ७–८ दलीय सत्ता गठबन्धन । सत्ता गठबन्धनमा आबद्ध दलबीच न राजनीतिक, सैद्धान्तिक कुरा मिल्न मिल्छ न रणनीति नै । उनीहरुबीच एक मात्र स्वार्थ मिल्छ– त्यो भनेको सत्तास्वार्थ हो ।

निर्वाचनपछि पनि सत्ताको चाबी छाड्न चाहँदैनन्, गठबन्धनमा आबद्ध दलहरू । त्यसैले अहिले चुनावमा सिट बाँडफाँटका लागि ११ सदस्यीय कार्यदल नै बनाएको छ । र, कार्यदलले भागबण्डा मिलाउने प्रयास गरिरहेको छ । यसलाई भन्छन्– माछा समात्न जाल फ्याँक्दा भ्यागुतो आए पनि आखिर नदीमा बस्ने चिज नै त हो भनेर तरकारी मान्ने ।

हाल सरकारमा भएका दलहरू अरू काम छाडेर आगामी निर्वाचनमा मात्र केन्द्रित भएको जस्तो देखिन्छ । नेपाली कांग्रेस चुनावपछि पनि सत्ताको नेतृत्व कसरी गर्ने भन्ने सोचिरहेको छ । गठबन्धनको नाममा फेरि पाँच वर्ष सत्ता आफ्नै पोल्टामा पार्न कांग्रेसले अनेक तिकडम अपनाइरहेको छ ।

गठबन्धनभित्र रहेका सबै राजनीति दलहरू बढी सिट कसरी लिने भन्ने ध्याउन्नमा देखिन्छन् । सिट बाँडफाँटमा नै अहिलेको गठबन्धनभित्र रहेका दलहरूले एक अर्काको अस्तित्व स्वीकार गर्न नसक्ने स्थिति देखिन्छ ।

कांग्रेसले आफू ठुलो दल भएको हैसियतले स्वाभाविक धेरै सिट चाहन्छ । तर माओवादी पनि के कम ! हिजो नेकपा एमालेको बुई चढेर प्रतिनिधिसभाको तेस्रो ठूलो दलको हैसियत र अहिले सरकारको काँध थामेको हिसाबले सकेसम्म अधिकतम सिट लिने ध्यानमा छ ।

यी दुई दलबाहेक एकीकृत समाजवादी र मधेसका दल पनि सकेसम्म धेरै सिटका लागि बार्गेनिङ गरिरहेका छन् ।

सिट बाँडफाँटका विषयमा कसरी सहमति जुट्छ ? त्यो त हेर्न बाँकी छ । तर निर्वाचनपछि सरकारको नेतृत्व गर्ने, सरकार सञ्चालन गर्ने कुरा बढी महत्त्वको भएकोले अहिले सिट बाँड्दा नै बढी लिनुपर्छ भन्ने कुरामा माओवादी सचेत छ । माओवादी सचेत हुनु स्वाभाविक पनि हो । उसलाई लाग्दो हो– कति अर्काको पछि लागेर सरकारको पुच्छर मात्रै हुने ? तर कांग्रेस अहिले जितेको स्थानीय तहलाई आधार बनाएर भए पनि आफू बढी सिट लिने कुरामा प्रस्ट छ ।

हिजो एमालेसँग निर्वाचनमा तालमेल गर्दा जसरी माओवादीले फाइदा लिएर धोका दियो, कांग्रेसलाई पनि त्यस्तै हुन्छ कि भनेर कांग्रेस सचेत होला । माओवादीलाई जसरी नेकपा एमालेले काँध थापेर यहाँसम्म ल्यायो, त्यसरी नै काँध अरूले थाप्ने स्थिति छैन ।

हिजो माओवादीले जसरी नेकपा एमालेसँग फाइदा लिएर पछि एमालेको काँधमा बन्चरो हान्यो, अब कांग्रेसलगायतका पार्टीहरुसँगको चुनावी तालमेलमा त्यस्तो नहुन सक्छ । त्यसैले माओवादी अवसरका लागि विचार नमिल्दासँग चुनावी तालमेल गर्दै छ । त्योभन्दा बढी बठ्याइँ कांग्रेसले गर्दै छ । जसले सम्पूर्ण सिटमध्ये ६० प्रतिशतको दाबी गरेको छ । यसलाई हेर्दा संघमा कांग्रेसको भागमा १६५ सिटमध्ये ९९ सिट, प्रदेशमा ६० प्रतिशत भन्दा १ सय ९८ सिटको लागी कांग्रेसले गठबन्धनलाई विकल्प मानेको छ । जुन अवसरले पाँच वर्ष सरकार सञ्चालनमा कांग्रेसको महत्त्वपूर्ण भूमिका रहन्छ । माओवादी, समाजवादीलगायतका पार्टीहरू पुनः कांग्रेसको पुच्छर मात्रै हुने सम्भावना छ । अवसरका लागि विचारभन्दा फरक पार्टीसँग घाँटी जोड्नेहरूको आखिरमा बेहाल नै हुने देखिन्छ ।

गठबन्धनकर्ताहरूको अहिलेको योजना हेर्दा लाग्छ– निर्वाचनबाहेक अरू योजना नबनाउने र नागरिकलाई न्याय र विकासको आभास गर्न नदिने खालको छ । गठबन्धन गर्ने, निर्वाचनमा जित हासिल गर्ने, बढी सिट ल्याउने र सरकारमा पाँच वर्ष मस्ती गर्ने योजना नै अहिलेको गठबन्धनको पहिलो प्राथमिकतामा देखिन्छ ।

कांग्रेस केही वर्ष सरकार बाहिर बस्यो । हिजो सरकारमा हुँदा जे सुख सुविधा भोग गरेको थियो, सरकार बाहिर रहँदा त्यो अवस्था रहेन । देशको ढुकुटी रित्याउन पाएन, आज त्यसको खोजीमा छ । त्यसैले जसरी हुन्छ बढी सिट प्राप्त गर्ने र पुनः सरकारको नेतृत्व हत्याउने सुरमा छ कांग्रेस ।

यता माओवादी अर्काको खुट्टामा उभिएर भए पनि केही सिट प्राप्त गर्ने र सरकारमा जाने कोसिसमा देखिन्छ । समाजवादी आफू एउटा टुक्रा किन नहोस् एमालेलाई देखाउन भए पनि गठबन्धनमा सामेल छ । मधेसी दलहरू पनि आफ्नो स्वार्थका लागि गठबन्धनमा सामेल हुन्छन् नै ।

स्थानीय तहको निर्वाचनमा गठबन्धनका उम्मेदवारले जितेका ठाउँमा नागरिकले सास्ती भोगिरहेका छन् । मंसिरमा हुने प्रदेश र संघको निर्वाचनमा नागरिकले यो गठबन्धनलाई विश्वास गरेर मत दिन्छन् वा दिँदैनन् भोलिको कुरा हो । तर गठबन्धनले उठाउने उम्मेदवारको हर्कत गतिलो नहुने निश्चित छ ।

गठबन्धनसँग कुनै गतिलो, नवीन एजेण्डा नै छैन । त्यसैले मतदाताले विचार गरेर मात्रै मतदान गर्नुपर्दछ– स्वार्थका लागि गठबन्धन गर्नेलाई रोज्ने कि देशको हितमा काम गर्नेलाई भनेर ।

शक्तिशालीहरू अहिले पनि एक्लै निर्वाचनमा जान तम्तयार छन् । जो कमजोर छन्– उनीहरूलाई गठबन्धन नगरी जनताले मत दिन्छन् भन्नेमा विश्वास छैन । र उनीहरू एक्लै चुनाव लड्ने हिम्मत नै गर्दैनन् । विकासका योजनाभन्दा पनि पैसाको भारी बोकेर मतदाता प्रभाव पार्ने खतरा पनि उतिकै छ । त्यसैले आउँदै गरेको निर्वाचनमा खास चनाखो बन्न आवश्यक छ ।

प्रमुख प्रतिपक्षी दल नेकपा एमाले गठबन्धनविरुद्ध एक्लै चुनाव लड्दैछ । अहिले नेकपा एमाले कम सिट जित्न तयार छ तर राष्ट्रिय हितको विपक्षमा जान कदापि तयार छैन । त्यसैले राष्ट्रिय आवश्यकता बुझेर सबैले विवेकपूर्ण मतदान गर्न आवश्यक छ ।


प्रतिक्रिया

One thought on “गठबन्धनको सत्तास्वार्थ र एमालेका चुनौती

  1. सहि विश्लेषण ठगबन्दन त हार्नै पर्छ यो गठबन्दन होिन ठगबन्दन हो

Leave a Reply to shrikanta Cancel reply

Your email address will not be published. Required fields are marked *