आर्यनले साइन गरे नयाँ फिल्म ‘सायरा’ – Nepal Press

आर्यनले साइन गरे नयाँ फिल्म ‘सायरा’

काठमाडौं । अभिनेता आर्यन सिग्देल नयाँ फिल्ममा अनुबन्धित भएका छन् । नेपाली फिल्ममा अभिनय गर्न सक्ने चकलेटी लुक्स भएका आर्यनले अभिनय गर्न लागेको नयाँ फिल्म हो , ‘सायरा’ ।

उनले आइतबार मात्र निर्माण कम्पनि डि.बि.आर. मिडिया एण्ड मुभिज प्रा.ली सँग फिल्म गर्ने लिखित सम्झौता गरेका हुन् । रघु परियार प्रस्तुतकर्ता रहेको फिल्म सोसल ड्रामा र लभ स्टोरीमा तयार हुनेछ । पछिल्लो समय पर्दामा नदेखिएका आर्यन फिल्मको विषयवस्तुले आकर्षित भएका हुन् ।

उनले सुहाउँदो क्यारेक्टर पाएपछि फिल्म गर्ने सम्झौता गरेका हुन् । आउँदो असोजबाट छायांकन गर्ने तयारीमा रहेको फिल्म ‘सायरा’ को ९० प्रतिशत छायांकन अष्ट्रेलिया र १० प्रतिशत नेपालमा हुनेछ । फिल्मका प्रस्तुतकर्ता रघुले दसैँ र तिहारमा छायांकनको तयारी भइरहेको बताए । ‘फिल्ममा सोसल ड्रामासँगै प्रेम कथा देखाइने छ । हाम्रो भूमिकालाई सुहाउँदो भएकाले आर्यनजीलाई अनुबन्धित गरेका हौँ । उहाँ पनि भूमिकालाई लिएर उत्साहित हुनुहुन्छ’ रघुले भने ।

उनले फिल्मको अन्य कास्ट एण्ड क्रिउको बारेमा केहि समयमै जानकारी दिने बताए । फिल्ममा कथा उनकै रहेको छ । निर्देशन भने उनले भारतीय रहने बताए । ‘हामीले लाइन–अप पुरा भएपछि पूर्ण रुपमा जानकारी दिने छौँ । निर्देशक बलिउडमा काम गरिरहेका भारतीय नै हुनेछन । उहाँलाई अनुबन्धित गरेपछि जानकारी गराउने छौँ’ प्रस्तुतकर्ता रघुले बताए ।

उनले फिल्मको कथावस्तु अनुसार नै डायस्पोरामा छायांकन गर्न लागिएको बताए । फिल्मको अधिकाँस छायांकन अष्ट्रेलियाको सिड्नीमा हुनेछ भने केहि प्रतिशत मेलवर्नमा समेत गरिने उनले जनाए ।

पर्दामा लभ स्टोरीलाई जीवन्त बनाउन माहिर मानिने आर्यनले केहि समय अगाडी निर्माण तथा अभिनय गरेको फिल्म ‘कायारा’ झैँ सुनिने उस्तै नाम भएको ‘सायरा’ मा काम गर्ने तयारी गर्न लागेका हुन् । केहि फिल्मको तयारीमा रहेका आर्यनले यो फिल्म आउँदो दसैँ र तिहारको समयमा छायांकन गर्ने गरी तयारी गरिरहेका छन् ।

रघु परियार , प्रस्तुतकर्ता:

एउटा स्तरीय नेपाली फिल्म बनाउने प्रयाश स्वरूप थालनी गरेका हौँ । यसमा मसँगै अन्य व्यक्तिहरु पनि जोडिनु भएको छ । फिल्ममा आर्यन सिग्देल अनुबन्धित हुनु भएको छ भने अन्य कलाकारहरुसँग कुराकानी भइरहेको छ ।

विशेषत फिल्ममा बलिउडमा रहेका निर्देशकसँग फिल्म निर्देशनको बारेमा कुराकानी भइरहेकाले उनी अनुबन्धित भएपछि उनकै सल्लाह अनुसार अन्य प्राविधिक लाइन–अप गरिने छ । फिल्मको छायांकन असोजमा सुरु गर्ने तयारी छ ।

यसको अधिकांश छायांकन अष्ट्रेलियाको सिड्नीमा हुनेछ भने केहि नेपालमा पनि गरिने छ । फिल्म सामाजिक कथावस्तुमै आधारित छ । आर्यनजी भएपछि लभ स्टोरी त स्वाभाविक भयो नै ।

प्रतिक्रिया

Leave a Reply

Your email address will not be published.