हेटौँडाकी मेयर मिना लामाको सम्पत्ति : १५ तोला सुन, ४० लाखको ट्याङ्कर

हेटौँडा । हेटौँडा उपमहानगरपालिकाकी मेयर मिना लामाले आफ्नो सम्पत्ति विवरण सार्वजनिक गरेकी छन् । विगत पाँच वर्ष उपमहानगरको उपप्रमुखको जिम्मेवारीमा समेत रहेकी लामाले आफूसँग १५ तोला सुन, २० तोला चाँदी र पारिश्रमिक बाहेक २० हजार बैंक मौज्दात रहेको बताएकी छन् ।

नेकपा एकीकृत समाजवादीबाट टिकट पाएकी लामाले पारिश्रमिक बापत पाउने ४० हजार रुपैयाँ कृषि विकास बैकमा रहेको जनाएकी छन् । सार्वजनिक गरेको सम्पत्ति विवरणमा अन्य कुनै पनि कारोबारमा आफू संलग्न नभएको जनाएकी छन् ।

उनले सार्वजनिक गरेको विवरणमा ससुरा कान्छा लामाको नामा हेटौँडा–१ चाइना क्वाटरमा ११ धुर, सासू सानुमैयाको नाममा सवा १० धुर र सवा ६ धुर र ससुरा कान्छा लामाको नाममा ११ रोपनी जमिन रहेको उल्लेख छ ।

त्यस्तै श्रीमान् सुनबहादुर लामाको नाममा कृषि विकास बैंकमा ४० लाख ऋण रहेको छ भने ४० लाख बराबरको ट्याङ्कर, छोरा सुमित लामाको नाममा एक वटा २ लाख ५० हजार बराबरको मोटरसाइकल रहेको उल्लेख छ ।