गगन र विश्वप्रकाशप्रति राजीवको कटाक्ष- मिडियामा हिरो हुन आयोग र प्यालेस जाने ?

काठमाडौं । नेपाली कांग्रेसका केन्द्रीय सदस्य राजीव ढुंगानाले महामन्त्रीद्वय विश्वप्रकाश शर्मा र गगन थापाले पार्टीको संस्थागत निर्णयभन्दा पनि मिडियामा हिरो हुन व्यक्तिगत गतिविधि गरिरहेको भन्दै आपत्ति जनाएका छन् ।

केन्द्रीय कार्य समितिको जारी बैठकको तेस्रो दिन बुधबार आफ्नो धारणा राख्ने क्रममा ढुंगानाले गैरआवासीय नेपालीलई मतदानको अधिकार माग्दै महामन्त्रीद्वय निर्वाचन आयोगमा गएकोमा प्रश्न उठाएका हुन् । आफूखुशी गर्ने छुट पदाधिकारीलाई नरहेको ढुंगानाको भनाइ थियो ।

ढुंगानाले भने, ‘विदेशमा बसेकालाई मताधिकारको व्यवस्था गर्नुपर्ने विषय पहिले केन्द्रीय समितिमा छलफल हुनुपर्ने थियो । पार्टीमा छलफल नगर्ने तर दुई महामन्त्री निर्वाचन आयोग जाने मिल्ने कुरा होइन । पार्टीको निर्णय संस्थागत हुनुपर्छ । आफूखुशी गएर कुरा गर्दै जाने हो भने भोलि अर्को पदाधिकारी कोहीसँग कुरा गर्लान् । त्यसलाई पार्टीको निर्णय कसरी मान्न सकिन्छ ?’

नेविसंघका पूर्वअध्यक्षसमेत रहेका ढुंगानाले केन्द्रीय समितिमा बसेर गर्नुपर्ने छलफल पार्टी प्यालेसमा हुन थालेको भन्दै यस्तो गर्ने हो भने बैठक पार्टी कार्यालयमा नगरी पार्टी प्यालेसमा गर्नुपर्ने बताए ।