बुढीगंगामा मतदान सकियो, आजै मतगणना हुने
कैलाली । बाजुराको बुढीगंगामा मतदान सकिएको छ । बिहान ७ बजेबाट सुरु भएको मतदान साँझ ५ बजे सकिएको हो ।
१० बुथका १९ मतदान केन्द्रमा मतदान भएको थियो । १३ हजार ६५९ मतदातामध्ये कति प्रतिशत मत खस्यो भन्नेबारे भने तथ्याङ्क लिने काम भइरहेको निर्वाचन अधिकारी नवराज अधिकारीले जानकारी दिए ।
उनले समग्रमा शान्तिपूर्ण मतदान सम्पन्न भएको बताए । वडा नम्बर ९ को मतदान केन्द्रमा विवाद भए पनि पछि अवस्था सामान्य भएको उनले बताए ।
उनका अनुसार आजै मतगणना सुरु हुनेछ । ‘मतदान सकिएको छ । अब सर्वदलीय बैठक बसेर आजै मतगणना हुनेछ’, उनले नेपालप्रेससँग भने ।
यहाँ प्रमुखमा एमालेबाट रामबहादुर बानियाँ र कांग्रेसबाट रङ्ग खाती चुनावी मैदानमा छन् । वैशाख ३० गते विवादका कारण निर्वाचन आयोगले यहाँको चुनाव आजको लागि मिति तोकेको थियो ।