बुद्धको मातृभूमि नेपाल विश्वकै लागि आस्था र श्रद्धाको केन्द्र : प्रधानमन्त्री देउवा

रुपन्देही । प्रधानमन्त्री शेरबहादुर देउवाले बुद्धको मातृभूमि नेपाल विश्वकै लागि आस्था र श्रद्धाको केन्द्र रहेको बताए । बौद्ध दर्शन, कला, शिक्षा, साहित्य तथा संस्कृतिको मूल स्रोतका रूपमा आफूलाई सिद्ध गर्नुपर्ने चुनौती रहेको बताउँदै उनले बुद्धको सन्देशलाई सबैतिर फैलाउनुपर्ने धारणा राखेका छन् ।

लुम्बिनी बौद्ध विश्वविद्यालयका कुलपतिसमेत रहेका प्रधानमन्त्री देउवाले शुक्रवार लुम्बिनी बौद्ध विश्वविद्यालयको द्वितीय दीक्षान्त समारोहलाई सम्बोधन गर्दै शिक्षा नै विकासको मार्गदर्शन भएको बताए ।

उच्च शिक्षा देशको स्रोत, साधन, सम्भावना, आवश्यकता र प्राथमिकतालाई पहिल्याइ जनशक्ति तयार गर्नेतर्फ केन्द्रित हुनुपर्ने उनको भनाइ थियो ।

बुद्धले प्रतिपादन गरेको आर्यअष्टाङ्गिक मार्गलगायतका सूत्रात्मक शिक्षा आजको २१ औँ शताब्दीमा पनि महत्त्वपूर्ण रहेको बताए । प्रधानमन्त्री देउवाले भने, ‘यसैले पनि आज संसारभर बौद्ध दर्शनको अध्ययन–अध्यापनलगायतका बुद्धद्वारा प्रतिपादित शिक्षाको अभ्यास केन्द्र स्थापना हुने क्रम उल्लेख्य रूपमा बढ्दै गएको छ ।’

प्रधानमन्त्री देउवाले सम्भावना र चुनौतीको यो संयोगले हामीलाई अझै बढी वैज्ञानिक, व्यवस्थित र युगानुकूल हुन ऊर्जा दिइरहने बताए ।

प्रधानमन्त्री देउवाले बौद्ध विविधतालाई समाजको सकारात्मक रूपान्तरणसँग जोड्दै समाजको सृजनशील सदस्यका रूपमा आफूलाई स्थापित गर्न दीक्षित अग्रसर रहने विश्वास व्यक्त गरे ।

उनले भने, ‘अध्यात्मको आलोकमा प्रकाशित तपाईँहरूको व्यावसायिक शिक्षा सामाजिक सद्भाव, शान्ति र आर्थिक उन्नयनका लागि विशिष्ट रूपमा प्रदीप्त भएको देख्न पाउनेमा आशा व्यक्त गर्दछु ।’

उनले मुलुक निर्माणको साझा कर्तव्य पूरा गर्न वैज्ञानिक अनुसन्धानद्वारा बौद्ध, कला, साहित्य पुरातत्त्व आदि समग्र क्षेत्रको विश्वव्यापी प्रवर्द्धन गर्न बौद्ध विश्वविद्यालयका विद्यार्थीमा अझै तीव्र उत्साह भरिएकोमा आफू विश्वस्त रहेको बताए ।

‘नखोजिएका पुरातात्त्विक सम्पदा खोजौँ, सांस्कृतिक विरासतको समृद्धि फैलाऔँ र ऐतिहासिक नेपाली माटोको मौलिक दर्शनलाई विश्वबन्धुत्वका लागि फैलाऔँ भन्ने गम्भीरता तपाईँहरूमा उद्भव भएको छ भन्ने विश्वाससमेत लिएको छु’, प्रधानमन्त्री देउवाले भने ।

लुम्बिनी बौद्ध विश्वविद्यालय बुद्ध जन्मस्थल लुम्बिनीमै हुनु भनेको विश्वविद्यालयको अपूर्व महत्त्व रहेको बताउँदै प्रधानमन्त्री देउवाले यस विश्वविद्यालयले बौद्ध अध्ययनका विभिन्न विधाको अध्ययन अध्यापन गराउनुका साथै दैनिक जीवन एवं चिन्तन शैलीको अभिन्न अङ्ग हुने गरी बौद्ध शिक्षाको देशव्यापी प्रचारप्रसारबाट समृद्ध मुलुक निर्माणको अभियानलाई सार्थकता दिन शिक्षाले महत्त्वपूर्ण भूमिका निभाउनुपर्नेमा जोड दिए ।

यसका साथै उनले बौद्ध पर्यटनका क्षेत्रमा आवश्यक जनशक्ति उत्पादन गरी बौद्ध रोजगारीलाई प्रश्रय दिने किसिमका नीति बनाउँदै अघि बढ्नुपर्ने बताए ।

प्रधानमन्त्री देउवाले लामो इतिहासदेखि प्रचलनमा रहेका बौद्ध परम्परा तथा संस्कृति विश्वकै मानव शास्त्री तथा बौद्ध अध्येताका लागि सदैव चासोको महत्त्वपूर्ण सम्पदाका रूपमा रहेको बताए ।

प्रधानमन्त्री देउवाले मुलुक राज्य पुनः संरचनासँगै संघीयताको कार्यान्वयनको चरणमा रहेको अवस्थामा सबै पक्षले विश्वविद्यालयलाई विशिष्टीकृत नमूना विश्वविद्यालयको रूपमा स्वीकार गरी त्यसैअनुसार विकास गर्नेतर्फ ध्यान केन्द्रित गर्नुपर्ने बताए ।

उनले विश्वविद्यालयमा हाल सञ्चालनमा रहेका कार्यक्रमको उत्कृष्टता खस्कन नदिई थप समयसापेक्ष र जीवनोपयोगी बनाउँदै लैजान आवश्यक रहेको औँल्याए ।

उनले भने, ‘बौद्ध शास्त्रीयताका संस्कृतिको संयोजनद्वारा समकालीन विश्वका सैद्धान्तिक समस्याको उत्तर खोज्ने दिशामा अग्रसर हुन ढिलाइ गर्नुपर्ने कुनै कारण देखिँदैन ।’

प्रधानमन्त्री देउवाले नेपालले दिगो पर्यटन विकासका लागि अन्तर्राष्ट्रिय प्रतिबद्धता जनाइसकेको परिप्रेक्ष्यमा यस विश्वविद्यालयले बौद्ध शिक्षाका माध्यमद्वारा सरकारले अङ्गीकार गरेका वातावरण तथा दिगो विकास नीतिलाई सहायकसिद्ध हुने गरी दिगो विकाससम्बन्धी अध्ययन, अध्यापन तथा अनुसन्धानमा लाग्न आग्रह गरे ।

उनले शाक्यमुनिले ४५ वर्ष अनवरत गरेको ज्ञानमय यात्रा आजको विश्वमा पनि सान्दर्भिक रहेको बताए ।

विश्वविद्यालयले आफूलाई बौद्ध दर्शन तथा शिक्षा पद्धतिको अध्ययन अध्यापनमा थप आकर्षक एवं अनुसन्धानमुखी कार्यक्रमसहितको अन्तर्राष्ट्रिय केन्द्रका रूपमा विकास गर्नुपर्नेमा प्रधानमन्त्री देउवाले जोड दिए ।

कार्यक्रममा शिक्षामन्त्री देवेन्द्र पौडेल, विश्वविद्यालयका उपकुलपति डा. हृदयरत्न ब्रजाचार्य, रजिस्टार डा. तिलक आचार्यलगायतले सम्बोधन गरेका थिए ।

दीक्षान्त समारोहमा पीएचडी गरेका १२ जना, स्नातक तथा स्नातकोत्तर गरेका ३२६ जनालाई दीक्षित गर्ने कार्यक्रम रहे पनि सबै सहभागी भएका थिएनन् ।