जेलमा रहेका गुन्डा नाइकेलाई भेटेको भन्दै डीएसपी केसीमाथि छानबिन

काठमाडौं । जेलमा रहेका गुन्डा नाइके समिरमानसिंह बस्न्यातलाई भेटेको भन्दै काठमाडौं प्रहरी परिसरले महानगरीय प्रहरी वृत्त स्वयम्भूका प्रमुख मिलन केसीमाथि छानबिन अगाडि बढाएको छ।

डीएसपीमाथि सोधपुछ लगायतका कामहरू भइरहेको परिसर स्रोतले जनाएको छ । केसीले आइतबार बस्न्यातलाई भेटेका थिए । नेपाल निर्माण व्यवसायी महासंघका तत्कालीन अध्यक्ष शरद गौचनको हत्या अभियोगमा बस्न्यात जेलमा रहेका छन् ।

उनी अनुसन्धानका क्रममा पुगेका थिए की अन्य कामले भन्नेबारे प्रहरीले केही खुलाएको छैन । मङ्गलवार बिहान डीएसपी केसीलाई टेकुस्थित परिसर कार्यालयमा बोलाइएको थियो ।

काठमाडौं प्रहरी परिसर प्रमुख सुदिप गिरीले छानबिन समिति गठन गरिएको बताए । उनका अनुसार परिसरमै दरबन्दी रहेका एसपी दिनेश मैनालीको संयोजकत्वमा छानबिन समिति गठन भएको छ।

‘व्यावसायिक कामले पुगेको भए हामीलाई रिपोर्टिङ हुनुपर्थ्यो। बाँकी सम्बन्धमा समितिले छानबिन गर्छ’, एसएसपी गिरीले भने।