भ्रष्टाचार आरोप लगाउनेलाई ओलीको चुनौती- मैले सबै सम्पत्ति राज्यलाई दिएको छु, अरुले पनि दिएर देखाउन् (भिडिओ)

काठमाडौं । पूर्वप्रधानमन्त्री तथा एमाले अध्यक्ष केपी शर्मा ओलीले आफूलाई भ्रष्टाचारमा जोडेर प्रचार गर्नेहरुलाई संसदको रोष्ट्रमबाट कडा जवाफ फर्काएका छन् । आफूले आफ्नो व्यक्तिगत सबै सम्पत्ति राज्यको नाममा गरेको भन्दै उनले अरु नेताहरुलाई पनि यसै गर्न चुनौती दिए ।

ओलीले प्रश्न गरे, ‘मैले आफ्नो र श्रीमतीको नामको सबै चलअचल सम्पत्ति राज्यको नाममा गरेको छु । मैले राज्यका नाममा सम्पत्ति ल्याइदिन भ्रष्टाचार किन गर्नुपर्ने ? कुनै महानुभाव निस्किनुस् न राज्यका नाममा सम्पत्ति हस्तान्तरण गर्ने ? केपी ओलीलाई मुखभरिको जवाफ दिन भए पनि घोषणा गर्नुस् त ?’

पूर्वप्रधानमन्त्रीहरुले आफूलाई घुमाइफिराइ छेड हान्ने गरेको भन्दै ओलीले उनीहरुलाई पनि आफ्नो सम्पत्ति राज्यका नाममा दान गर्न आग्रह गरे । ‘मैले सम्पत्तिमा लोभ गर्नुपर्ने केही छैन । अर्काको नाममा सम्पत्ति राखेर आफू बदनाम हुनुपर्ने कुनै कारण छैन । आफू नखानेले अर्कोलाई किन खुवाउँछ ?’ ओलीले भने ।

भर्खरै एक विद्वानले ओलीसँग २०–३० अर्ब रुपैयाँ रिजर्भ बैंकमा भएको भन्दै टेलिभिजनमा अन्तर्वार्ता दिएको आफूले हेरेको उनले बताए ।
ओलीले भने, ‘त्यसको छानबिन गरियोस् र यदि मेरो नाममा कुनै पैसा भेटिए त्यो सबै तिनै विद्वानको नाममा गर्न म रिजर्भ बैंकलाई आग्रह गर्छु ।’