बेनिशा भन्छिन्- बलात्कारीलाई सजाय यस्तो होस कि गलत नियत राख्नेको सोच पनि कामोस् – Nepal Press

बेनिशा भन्छिन्- बलात्कारीलाई सजाय यस्तो होस कि गलत नियत राख्नेको सोच पनि कामोस्

काठमाडौं । लामो समयको ग्यापपछि नायिका बेनिशा हमाल एउटा आइटम गीतमा देखिएकी छिन् । चलचित्र ‘प्रेमगञ्ज’ को ‘तरबार’ बोलको आइटम गीतमा उनले नृत्य गरेकी हुन् । आज एक कार्यक्रममा उक्त आइटम डान्स लन्च गरियो ।

ग्ल्यामरस् र सेक्सी लुक्समा प्रस्तुत भएकी हमालको कम्मर मर्काइले सबैको तारिफ पाइरहेको छ । दीक्षा जे थापा र सुरज शाही ठकुरीको स्वर रहेको यो गीतको दृश्य र नृत्य झट्ट हेर्दा भारतीय शैलीको आइटम गीत जस्तो देखिन्छ ।

भिडियो सार्वजनिक गर्न आयोजित प्रेस मिटमा बेनिशालाई अहिलेको चर्चामा रहेको बलात्कारको मुद्दामाथि प्रश्न गरियो ।

उनले यसरी जवाफ दिइन्:

अहिले जताततै यही कुरा छाएको छ । एक छिन फ्री हुने बित्तिकै वा प्रोग्राम सकिने बित्तिकै पनि के भयो होला भनेर हेर्ने गर्छु । यो एकदमै गहन र संवेदनशील कुरा छ । खुसी पनि छु कि कति दबिएका र दबाइएका आवाजहरू बाहिर निस्किरहेका छन् । जति पनि सर्भाइवरहरु हुनुहुन्छ, उहाँप्रति मेरो हृदयदेखि नै धेरै सम्मान छ । आँट गरेर आवाज उठाउनुभएको छ अहिले । त्यसमा मेरो साथ छ । अझै धेरै पावर मिलोस् । अझै धेरै माया ।

मान्छे सुरक्षित नै कहाँ छ र ? यहाँ सुरक्षा नै छैन । यो हप्ताको मात्र समाचारहरू नै हेरौँ न । शिक्षकबाट यौन हिंसाहरू भइरहेका छन् । स्कुलमा सुरक्षा छैन ।

हस्पिटलमा सुरक्षा छैन । सुरक्षाकर्मीबाट सुरक्षित छैनन् चेलीहरू । आफ्नै मान्छेबाट सुरक्षित छैनन् । हामी छोरी भएर जन्मिसकेपछि लाइफको कहीँ न कहीँ, कुनै न कुनै पलमा चाहे शारीरिक हिसाबले होस् या मानसिक हिसाबले, यौन दुर्व्यवहार वा उत्पीडनको सिकार भइरहेको हुन्छौँ । शारीरिक मात्र होइन मानसिक शोषण पनि शोषण हो ।

कसैले सुनिदिएन वा विश्वास गरिदिएन भने आफैँलाई म नै पो गलत हो कि जस्तो लाग्छ । मैले यसरी खुलेर बोलेकाले वा सबैसँग मिलेकाले पो यस्तो घटना घटेको हो कि जस्तो लाग्छ ।

आशा भन्ने कुरा धेरै नै खतरनाक चिज हो । संसारमा कोही मान्छे नभए पनि यसले चाहिँ मलाई न्याय दिन सक्छ, यसले चाहिँ सुनिदिन्छ भन्ने मान्छेबाट आफूले आशा गरे अनुरूपको रिजल्ट वा रेस्पोन्स नपाउँदा जसलाई पनि दुख लाग्छ ।

यदि त्यतिखेर त्यो मान्छेले मेरो कुरा सुनिदिएको भए यत्रो वर्षसम्म पटक पटक मैले यही पिडामा बाच्नुपर्ने थिएन भन्ने हुन्छ । यस्तो बेलामा मनभित्र खुम्चिएको कुरा निक्लिनु स्वाभाविक हो ।

यही भन्न चाहन्छु, यति कडा सजाय होस् कि त्यो व्यक्तिलाई, गलत नियतको सोच राख्नेको सोच पनि कामोस् ।

प्रतिक्रिया

Leave a Reply

Your email address will not be published.

सम्बन्धित खवर