हेटौंडा उपमहानगरको मेयरमा गठबन्धनकी लामा जित नजिक

हेटौंडा । सत्ता गठबन्धनबाट नेकपा एकीकृत समाजवादीकी मीना लामा बागमती प्रदेशको राजधानी हेटौँडा उपमहानगरपालिकाको मेयरमा जित नजिक पुगेकी छन् ।

हालसम्म हेटौंडामा ६७ हजार ४४३ मत गणना भएको छ । जसमध्ये लामाले २१ हजार २०३ मतसहित अग्रस्थानमा छिन् । दोस्रो स्थानमा रहेका एमाले अनन्तप्रसाद पौडेलले १९ हजार १२५ मत पाएका छन् । राप्रपाका दीपकबहादुर सिंहले १८ हजार ६२६ मतसहित तेस्रो स्थानमा रहेका छन् ।

कूल ७३ हजार ४४३ मत खसेको हेटौंडामा यो पटक कम मत बदर भएको छ । हालसम्म वडा नम्बर १, २, ३, ४, ५, ६, ७, ८, १४, १५, १६, १७, १८ र १९ को मत परिणाम आइसकेको छ । जसमा नेपाली कांग्रेसले ८ वटा वडामा जित हासिल गर्दा एमालेले ६ वटा वडा जितेको छ ।

हाल वडा नम्बर ९ मा नेकपा समाजवादी अगाडि छ भने वडा नम्बर १०, ११ तथा १३ मा एमाले र वडा नम्बर १२ मा नेपाली कांग्रेसले अग्रता कायम गरेको छ ।