ह्याट्रिक पूरा गर्ने मौका गुमाउँदै मेस्सीले एमबाप्पेलाई दिए पेनाल्टी हान्न – Nepal Press

ह्याट्रिक पूरा गर्ने मौका गुमाउँदै मेस्सीले एमबाप्पेलाई दिए पेनाल्टी हान्न

पेरिस । फ्रान्सको घरेलु लिग फुटबल लिग वानअन्तर्गत शनिबार राति भएको खेलमा पेरिस सेन्ट जर्मन–पीएसजीले मन्टपेलियरलाई ४–० गोलले हरायो।

पीएसजीको जितमा लियोनल मेस्सीले दुई तथा केलियन एमबाप्पे र एन्जेल डी मारियाले एक एक गोल गरे। यसअघि नै उपाधि जित्ने निश्चित गरिसकेको पीएसजीका लागि मेस्सीले शनिबार ह्याट्रिक पूरा गर्ने अवसर प्रयोग गरेनन्।

६० औं मिनेटमा पीएसजीले पाएको पेनाल्टीको अवसरमा मेस्सी अघि सरेर गोल गरेको भए उनले ह्याट्रिक पूरा गर्ने थिए। तर मेस्सीले आफूले पेनाल्टी हानेनन्, एमबाप्पेलाई अघि सारे। एमबाप्पेलाई नै फल भएपछि पीएसजीले पेनाल्टी पाएको थियो। त्यसअघि मेस्सीले छैटौँ र २० औँ मिनेटमा गोल गरेका थिए।

दुवै गोलमा एमबाप्पेले असिस्ट गरेका थिए। खेलमा आफुले दुई गोल गरेको अवस्थामा पाएको पेनाल्टी मेस्सीले प्रहार नगरेको यो पहिलोपटक भने होइन। पीएसजी आएयतासमेत यसअघि मेस्सीले गोल गर्दा ह्याट्रिक पूरा हुने पेनाल्टी अर्कैलाई हान्न दिएका थिए। मेस्सीले यो सिजन पीएसजीका लागि ३३ खेलमा ११ गोल गरेका छन्। उनले घरेलु लिगमा २५ खेलमा ६ गोल गरेका छन्।

प्रतिक्रिया

Leave a Reply

Your email address will not be published.