कांग्रेस महामन्त्री शर्मा भन्छन्: माओवादीलाई भोट माग्नु रहर होइन, बाध्यता हो

रुपन्देही । नेपाली कांग्रेसका महामन्त्री विश्वप्रकाश शर्माले माओवादी भोग्नु माग्नु आफूहरुको रहर नभएर बाध्यता भएको बताएका छन् । नेपाली कांग्रेस कमजोर भएर गठबन्धन नगरेको बताउँदै उनले संविधान रक्षाका लागि बाध्य भएर गर्नुपरेको तर्क गरेका हुन् । उनले तालमेलबाट उम्मेदवार बनेका सबैलाई मतदान गर्न आग्रहसमेत गरेका छन् ।

स्थानीय तहमा पाँच दलबीच भएको तालमेललाई इमान्दारीपूर्वक पालना गर्न आग्रह गर्दै उनले आ–आफ्नो दलको प्रचारमा हिँडेका कार्यकर्ताले अन्य दलमा मतदान गर्न मनले नमाने पनि एकचित्त बुझाएर तालमेल गरेका उम्मेदवारलाई जिताउन आग्रह गरे ।

रुपन्देहीको तिलोत्तमा नगरपालिकामा नेपाली कांग्रेस र माओवादी केन्द्र मिलेर बनेको गठबन्धनको संयुक्त आमसभामा महामन्त्री शर्माले भने, ‘नेपाली कांग्रेसको प्रचारमा हिंडेका कार्यकर्तालाई माओवादीलाई भोट माग्दा अफ्ठ्यारो महसुस हुन्छ, तर पनि संबिधानको रक्षाको लागि एकदिन मन थामेर तालमेलका उम्मेदवारलाई मतदान गर्नुहोस् । ’

नेकपा एमालेका अध्यक्ष केपी शर्मा ओलीले नेपाली कांग्रेसको घोषणापत्रको धज्जी उडाएको बताउँदै अहिलेको समयमा कांग्रेस र एमालेको दुवैको घोषणापत्र पढेर मतदान गर्न उनको आग्रह छ ।