ओलीको टिप्पणी आफ्नै लाज छोप्ने ‘निन्जा टेक्निक’ मात्रै हो : नेता पौडेल

काठमाडौं । नेपाली कांग्रेसका नेता प्रदीप पौडेलले नेकपा एमालेका अध्यक्ष केपी शर्मा ओलीले कांग्रेसको घोषणापत्रमाथि गरेको टिप्पणी मनगढन्ते रहेको बताएका छन् ।

एमाले अध्यक्ष ओलीले जनतालाई झुक्याउने र आफ्नो लाज छोप्ने ‘निन्जा टेक्निक’ अपनाएको पौडेलको आरोप छ । सामाजिक सञ्जालमार्फत धारणा राख्दै कांग्रेस केन्द्रीय सदस्य पौडेलले ओलीले आफ्नो सरकारका काण्डहरुको जति बचाउ गर्‍यो उत्ति नै नाङ्गिदै जाने बताए ।

‘कांग्रेस घोषणापत्रको बारेमा ओलीको मनगढन्ते टिप्पणी जनता झुक्याउन र लाज छोप्न रचिएको निन्जा टेक्निक हो । राजनीतिक मर्यादाको सामान्य हेक्का नराखी खर्चिएका शब्द कुण्ठाका पराकाष्ठा हुन्’, पौडेलले भनेका छन् ।

एमाले अध्यक्ष ओलीले कांग्रेसको घोषणापत्रलाई गालीगलौजको पुलिन्दा र पागलहरूको प्रलाप भनी टिप्पणी गरेका थिए ।