आरजुलाई साक्षी राखेर सिर्जनाले भनिन्- महिलाले घर चलाए झैं महानगर चलाएर देखाउँछु (भिडिओ)

काठमाडौं । काठमाडौं महानगरपालिकाको मेयरमा सत्ता गठबन्धनबाट कांग्रेसकी उम्मेदवार सिर्जना सिंहले जनतासँग गरेका प्रतिबद्धता पूरा गर्ने बताएकी छन् ।

मंगलबार आफ्नै निवास चाक्सीबारीमा आयोजित कार्यक्रममा सिंहले पार्टीले सार्वजनिक गरेको घोषणापत्र र आफूले सारेका योजनालाई पूरा गर्ने प्रतिबद्धता जनाए ।

‘राजधानी काठमाडौंलाई सवैको साझा र सुरक्षित सहर बनाउँछु । महिलाले राम्रोसँग घर चलाए झैं काठमाडौं महानगरलाई सफासुग्घर तबरले चलाएर देखाउँछु ।’

कार्यक्रममा कांग्रेस नेतृ एवं प्रधानमन्त्रीपत्नी आरजु राणा देउवाले महिला नेतृत्वबाट नै अब महानगरको मुहार फेर्न सकिने भन्दै सिर्जना सिंहलाई जिताउन आह्वान गरिन् । मुलुकको परिवर्तनमा महिलाहरूले धेरै योगदान गरेको भन्दै अब पदमा रहेर देशका सेवा गर्ने समय आएको आरजुको भनाइ छ ।

काठमाडौंकी उपमेयर हरिप्रभा खड्गीले पाँच वर्षमा महानगरमा भएको विकासलाई निरन्तरता दिन सिर्जना सिंहलाई विजयी गराउनुपर्नेमा जोड दिइन् । काठमाडौंलाई सांस्कृतिक सहरको रूपमा अघि बढाउनुपर्ने उनको भनाइ थियो ।