गुल्मीकाे रेसुङ्गामा १०२ वर्षे मतदाताको आशीर्वाद लिएर चुनावी अभियान सुरु
नेपाल प्रेस
२०७९ वैशाख १३ गते १३:४२
गुल्मी । रेसुङ्गा नगरपालिका प्रमुखका उमेदवार नेपाली कांग्रेस गुल्मीका सभापति खिलध्वज पन्थीले शताब्दी पुरुषसँग आशीर्वाद लिएर घरदैलो अभियान सुरु गरेका छन् ।
सोमबार रेसुङ्गा नगरपालिकाको प्रमुखमा मनोनयन दर्ता गरेपछि पन्थीले नगरवासी १०२ वर्षीय पर्शुराम पन्थी उपाध्यायसँग आशीर्वाद लिएर घरदैलो अभियान सुरु गरेका हुन् । उपाध्याय रेसुङ्गाका सबैभन्दा पाका मतदातासमेत हुन् ।
२०१६ सालमा बीपी कोइराला गुल्मी पुग्दा उपाध्यायकै घरमा बास बसेका थिए । गुल्मी कांग्रेसका सभापति एवं प्रमुखका प्रत्यासी पन्थीले शताब्दी पुरुषको आशीर्वादले आफूलाई ऊर्जा दिएको बताए । ‘ज्येष्ठ नागरिकहरु नगरका धरोहर हुन् । १ सय वर्षभन्दा बढी उमेर पुगेका नागरिकको आशीर्वाद लिएर चुनावी अभियानमा होमिएको छु । मेरो उत्साह बढेको छ’, पन्थीले भने ।
उपाध्यायलाई भेट्न पन्थीसहित उपप्रमुखका उम्मेदवार अमृतादेवी कुँवर र वडा कार्यसमितिका प्रत्यासीहरु पुगेका थिए ।
नेपाल प्रेस
प्रकाशित: २०७९ वैशाख १३ गते १३:४२
प्रतिक्रिया
सम्बन्धित खवर
