ओखलढुङ्गामा गठबन्धनबाट बाहिरियाे जसपा – Nepal Press

ओखलढुङ्गामा गठबन्धनबाट बाहिरियाे जसपा

काठमाडौं। ओखलढुङ्गामा जनता समाजवादी नेपालले गठबन्धनबाट बाहिरिएको घोषणा गरेको छ । जसपाले एक विज्ञप्ति जारी गर्दै पाँचदलीय गठबन्धनभन्दा बाहिर रहेर चुनाव लड्ने जनाएको हो ।

स्वार्थ बोकेका दलसँग सहकार्य गर्न नसकिने जनाउँदै आगामी निर्वाचनमा एक्लै चुनाव लड्ने र पार्टीको यो निर्णयले जिल्लामा पार्टीप्रति आस्था राख्ने नेता, कार्यकर्ता र शुभचिन्तकहरूमा खुसी छाएको पार्टी अध्यक्ष खेमराज खड्काद्वारा हस्ताक्षरित विज्ञप्तिमा उल्लेख छ ।

जिल्लामा कांग्रेस र माओवादीले बलमिच्याइँ गर्दै एकलौटी निर्णय गरेकाले गठबन्धनभित्र रहन नसक्ने जसपा नेता नरेश नेम्वाङले बताए । उनले अब एमालेसँग चुनावी तालमेल हुनसक्ने जानकारी दिए ।

स्थानीय तहको निर्वाचन लक्षित गठबन्धनका बैठकमा सहभागी भए पनि पछिल्लो समय कांग्रेस र माओवादीले गठबन्धनको मर्म र भावनाविपरीत आफूखुसी भागबन्डा गरेकाले जसपा गठबन्धनबाट बाहिरिएको उनले नेपाल प्रेससँग बताए ।

उनका अनुसार एमालेसँग खिजीदेम्बामा प्रमुख र मानेभन्ज्याङमा उपप्रमुख लिएर चुनावी मैदानमा जान सकिने सम्भावना रहेको छ । जिल्लामा दुई गाउँपालिका र अन्य स्थानीय तहका केही वडामा जसपाको प्रभाव राम्राे रहेको छ ।

प्रतिक्रिया

Leave a Reply

Your email address will not be published.

सम्बन्धित खवर