भागबण्डा मिलाउन गठबन्धन बैठक फेरि सुरु

काठमाडौं । केही समयका लागि स्थागित भएको पाँच दलीय सत्ता गठबन्धनको बैठक फेरि सुरु भएको छ । चुनावी तालमेलका लागि भागबण्डा मिलाउन प्रधानमन्त्रीनिवास बालुवाटारमा फेरि पाँचै दलका शीर्ष नेतासँगै तालमेल संयन्त्रका नेताहरु भेला भएका हुन् ।

बैठक स्थगित हुनुअघि पार्टी मुख्यालय पेरिसडाँडामा पत्रकार सम्मेलन गरी माओवादी केन्द्रका अध्यक्ष पुष्पकमल दाहाल प्रचण्डले पाँचै दलबीच सहमति नभए कुरा मिल्ने दलबीच चुनावी तालमेल हुने बताएका छन् । उनले कुनै पनि दलबीच सहमति नभए माओवादी एक्लै चुनाव लड्न पनि तयार भएको बताएका छन् ।

पत्रकार सम्मेलन सकेर प्रचण्ड बालुवाटार फर्किसकेका छन् । गठबन्धनमा आवद्ध दलबीच महानगर र उपमहानगरको भागबण्डामा छलफल भइरहेको बताइएको छ । बैठकमा सम्भावित खाका प्रस्तुत भए पनि कुनै निष्कर्ष निस्किएको छैन ।