महासंघले भन्यो- प्रशारण नियमावलीको संशोधन अपूर्ण, अवैध ओटीटीहरु तत्काल बन्द हुनुपर्छ (भिडिओ)

काठमाडौं । नेपाल केवल टेलिभिजन व्यवसायी महासंघले नेपालमा गैरकानूनीरुपमा सञ्चालित विदेशी ओटीटीहरु तत्काल बन्द गराउन माग गरेको छ । सरकारले राष्ट्रिय प्रशारण नियमावलीमा हालै गरेको संशोधन त्रुटीपूर्ण रहेको समेत महासंघले प्रतिक्रिया दिएको छ ।

महासंघका तर्फबाट महासचिव मनोज गुरुङले आज एक विज्ञप्ति जारी गर्दै यस्तो प्रक्रिया दिएका हुन् । सरोकारवाला पक्षसँग छलफल र सहभागिताबिना गुपचुप रुपले नियमावलीमा गरिएको ११ औं संशोधनमा संविधान प्रदत्त मौलिक हकमाथि नै प्रतिवन्ध लगाउने कतिपय प्रावधान रहेको विज्ञप्तिमा उल्लेख छ ।

‘त्यस्ता त्रुटिपूर्ण तथा असंवैधानिक संसोधनका अधिकांश प्रावधान उपर यस महासंघ घोर आपत्ति व्यक्त गर्दछ, ‘विज्ञप्तिमा भनिएको छ, ‘महासंघले विगतदेखि नै उठान गर्दै आएका केही विषयहरु समेटिए पनि अझ धेरै विषयहरु समेटिएका छैनन् भने कतिपय प्रावधानहरु निश्चित प्रदायकहरुलाई मात्र लाभ पुर्‍याउने गरी संसोधन गरिएको आभास हुन्छ ।’

नियमावली संसोधनले ओटीटी सञ्चालन गर्नको लागि सञ्चार तथा सूचना प्रविधि मन्त्रालयबाट अनिवार्य इजाजतपत्र प्राप्त गर्नुपर्ने स्पष्ट व्यवस्था गरेको विज्ञप्तिमा स्मरण गराइएको छ । अब उप्रान्त कानूनतः इजाजतपत्र नलिई हाल सञ्चालनमा रहेका Amazon, Prime, Hostar, Alt Balaji, Zee5, VOOT, Disney Hotstar, Sonyliv, ullu जस्ता सयौं विदेशी ओटिटिहरु स्वतः गैरकानूनी ठहर भएकोले तत्कालै बन्द गराउनु पर्ने महासंघको माग छ ।