झलनाथको प्रतिक्रियाः अमेरिकासँग झुक्नेले सम्झौता गरेछन्, मेरो सधैं विरोध हुन्छ

काठमाडौं । एमसीसी संसदमा टेबल गर्न सत्तागठबन्धनका शीर्षस्थ नेताबीच भएको सहमतिप्रति नेकपा एसका सम्मानित नेता झलनाथ खनालले आपत्ति जनाएका छन् । पार्टीले यथास्थितिमा एमसीसी टेबल हुन नहुने निर्णय गरेको भन्दै गठबन्धनका नेताहरुबीच भएको सहमतिप्रति खनालले आपत्ति जनाएका हुन् ।

‘मलाई त बैठकमा बोलाउँदै बोलाइएन, अमेरिकासँग झुक्नेले सम्झौता गरे अरे, तर मेरो यसमा सधैं विरोध रहन्छ’, खनालले नेपाल प्रेससँग भने, ‘अहिले संसद नै चलिरहेको छैन, कहाँ लगेर टेबल गर्छन् ?’

एमसीसी राष्ट्रघाती भएको तर्क गर्दै उनले नेताहरुबीच भएको सहमतिलाई स्वीकार्न नसकिने बताए । ‘यो एउटा सामान्य करार सम्झौतालाई संसदमा लैजान जरुरी नै छैन’, उनले भने ।

नेकपा एसको हिजो बसेको स्थायी कमिटी बैठकले एमसीसी संसदमा टेबल गर्न दिने तर विपक्षमा उभिने निर्णय गरेको भनिएको थियो । तर खनालले पार्टीमा त्यस्तो निर्णय नभएको बताए ।

सत्तागठबन्धनका शीर्ष नेताबीच आजकै संसदमा एमसीसी टेबल गर्ने सहमति भएको भनिएको छ ।