सहिद दिवसको अवसरमा विवेकशील साझा पार्टीद्वारा सहिदगेटमा संकल्प कार्यक्रम

काठमाडौं, १६ माघ । सहिद दिवसका अवसरमा विवेकशील साझा पार्टीले राजधानीको सहिदगेटमा संकल्प कार्यक्रमको आयोजना गरेको छ ।

देशलाई निरंकुश व्यवस्थाबाट मुक्ति दिलाउन ज्यानको आहूति दिने सहिदहरु धर्मभक्त माथेमा, गंगालाल श्रेष्ठ, शुक्रराज शास्त्री, दशरथ चन्द लगायत थुप्रै ज्ञातअज्ञात सहिदप्रति श्रद्धासुमन प्रकट गर्दै उनीहरुले देखाएको मार्गमा प्रतिवद्ध रहने संकल्प गरिएको हो ।

कार्यक्रममा सहभागी पार्टीका सदस्यहरुले पटकौंपटक भएका आन्दोलन र बलिदानीबाट पनि जनताका न्यूनतम अधिकार र आकांक्षा पूरा हुन नसकेकोतर्फ चिन्ता व्यक्त गरे । सहिदहरुको सपना पूरा गर्न र जनताका न्यूनतम आवश्यकता पूरा गर्न फेरि संघर्ष र आन्दोलन गर्नुपर्ने अवस्था आएको भन्दै नेताहरुले त्यसका लागि तयार रहन सबैलाई अपीलसमेत गरे ।

कार्यक्रममा पार्टीका नेताहरु शोभा शाक्य, निर्देश सिलवाल, प्रकाशचन्द्र परियार, पुरुषोत्तम ढुंगेल, उद्धवराज भेटुवाल, विकास मानव लगायतले बोलेका थिए ।