नेपाली म्युजिक भिडिओले राख्यो गिनिज वर्ल्ड रेकर्ड

काठमाडौं । ५०२० मिटर उचाइमा छायांकन गरिएको नेपाली म्युजिक भिडिओले विश्व कीर्तिमान राखेको छ । गिनिज बुक अफ वर्ल्ड रेकर्ड्सले सोलुखुम्बुको खारेमा सुटिङ गरिएको गीतलाई मान्यता दिएको हो ।

गिनिज बुकले सन् २०२१ को सेप्टेम्बरमा कीर्तिमानको मान्यता प्रदान गरेको जनाएको छ । नेपालका पाँचजना कलाकारहरु बुद्धिराज राई, टेकबहादुर राई, शिखरजंग श्रेष्ठ, सृजना किराँती र माया गुरुङको गीतले मान्यता पाएको हो ।

यी पाँचजनाले निर्माण गरेको म्युजिक भिडिओमा यसअघि नेपालीले नै निर्माण गरेको गीत ‘सुन्दर हिमाल’को रेकर्डलाई भंग गरेको हो । पछिल्लो तीनवर्षमा सफलतापूर्वक तेस्रोपटक रेकर्ड ब्रेक भएको गिनिज बुकले जनाएको छ ।

बुद्धिराज राई (दुर्लभ जन्तरे) निर्देशित कीर्तिमान राख्न सफल यो गीतलाई केही दिनमै युट्युवमार्फत रिलिज गर्ने तयारी भएको छ ।