कैलालीमा भयावह बन्दै कोरोना: सीमामा सयौँ भेटिन्छन् संक्रमित तर, सोझै पुग्छन् घर – Nepal Press

कैलालीमा भयावह बन्दै कोरोना: सीमामा सयौँ भेटिन्छन् संक्रमित तर, सोझै पुग्छन् घर

कैलाली । पछिल्लो केही दिन यता कैलालीमा कोरोना संक्रमितहरुको संख्या अत्याधिक गतिमा बढिरहेको छ । शुक्रबार सेती प्रादेशिक अस्पतालमा गरिएका परीक्षणमा ६६ जनामा कोरोना संक्रमण पुष्टि भएको छ ।

१२१ जनामा परिएको परीक्षणमा ६६ जनामा कोरोना संक्रमण पुष्टि भएको अस्पतालका सूचना अधिकारी दिलीप कुमार श्रेष्ठले जानकारी दिए ।पछिल्लो २४ घण्टामा ६६ जनामा कोरोना संक्रमण हुँदा ५५ जनामा नभएको पुष्टि भएको हो । उनले पछिल्लो केही दिन यता संक्रमितहरुको संख्या तीव्र गतिमा बढिरहेको बताए ।

‘प्रत्येक दिन कोरोना संक्रमितहरुको संख्या बढिरहेको छ ’ उनले भने ‘अहिले परीक्षण भएकामा सङ्क्रमित नहुनेहरू भन्दा हुनेहरू बढिरहेका छन् ।’

पछिल्लो चार महिनामा सबै भन्दा धेरै संक्रमित शुक्रबार फेला परेका हुन् । कैलालीमा बुधवारबाट कोरोना संक्रमितहरुको संख्या एक्कासी बढेको हो । पुसको २० गते गरिएको ३५ जनाको परीक्षणमा २ जना, २१ गते ४४ जनामा २ जना, २२ गते २४ जनामा २ जना, २३ गते ५६ जनाको परीक्षणमा ६ जना, २४ गते ३६ जनाको परीक्षणमा ८ जना, २६ गते ८७ जनाको परीक्षणमा १२ जना, २७ गते ७६ जनाको परीक्षण गरिएकोमा २१ जनामा कोरोना पुस्टी भएको छ।

यस्तै २८ गते १०५ जनाको परीक्षणमा ४५ जना, २९ गते १६१ जनाको परीक्षणमा ४ जना र शुक्रवार १२१ जनाको परीक्षणमा ६६ जनामा कोरोना पुष्टि भएको सेती प्रादेशिक अस्पतालले जनाएको छ।

पछिल्लो केही दिन यता समुदायमा पनि कोरोना संक्रमण फैलिएको आशङ्का गरिएको छ । धनगढी उपमहानगरपालिकाको स्वास्थ्य शाखाका अनुसार ट्राभल हिस्ट्री समेत नभएकाहरू संक्रमित हुन थालेपछि समुदायमा संक्रमण फैलिन थालेको आशङ्का गरिएको छ ।
भारतबाट आएका संक्रमितहरू सोझै घर जानेगरेकाले पनि समुदायमा संक्रमण फैलन थालेको बताइएको छ ।

भारतको नयाँ दिल्ली, पुना, बेंलोर लगायतका ठाउँबाट आएका सयौँमा प्रत्येक दिन कोरोना पुष्टि भइरहेको छ । तर, उनीहरू सार्वननिक सवारी मार्फत नै घर सम्म गइरहेका छन् ।

कोरोना सङ्क्रमित भएकाहरूलाई आइसोलेसनमा राख्नु पर्ने हो तर,वडाध्यक्षकै दबाबमा उनीहरूलाई यहाँबाट झिकाइने गरेको गुनासो बढिरहेको छ स्वास्थ्य शाखाका जनस्वास्थ्य अधिकृत लक्ष्मीराज उपाध्ययाले भने, संक्रतिमहरु होल्डिङ सेन्टरबाट समय भन्दा अघि नै घर जाने गरेको हुँदा समस्या थप हुने सङ्केत देखिएको छ ।

शुक्रबार मात्रै ७५० परीक्षण गर्दा १५० जनामा संक्रमित फेला परेका छन्। भारतबाट आउनेहरू मध्ये बढी भन्दा बढिमा कोरोना संक्रमित देखिने गरेको छ ।

पछिल्लो १० दिनमा सुदूरपश्चिम भरी १४ सय ९३ कोरोना संक्रमितथपिएका छन्। सुदूरपश्चिम स्वास्थ्य निर्देशनालयले दिएको जानकारी अनुसार दैनिक जसो संक्रमितहरू थपिन थालेका हुन्।

१० दिनको तथ्याङ्क हेर्ने हो भने २० गते ४० जना संक्रमित भएको प्रदेशमा २९ गते त्यसको झन्डै ९ सय प्रतिशत अथवा ३१८ जनामा कोरोना देखिएको छ। सीमा क्षेत्रबाट होल्डिङ सेन्टर सम्म पुराइएकाहरू सबै त्यहाँ नबस्दा समस्या विकराल बन्ने आशङ्का गरिएको छ ।

प्रतिक्रिया

Leave a Reply

Your email address will not be published. Required fields are marked *