भौतिकमन्त्री सोडारीका छोरा पक्राउ, ‘सवारी ज्यान मुद्दा’को अभियोग

कैलाली । सुदूरपश्चिमका भौतिक पूर्वाधार विकासमन्त्री दीर्घबहादुर सोडारीका छोरा बबी सोडारी पक्राउ परेका छन् । जिल्ला प्रहरी कार्यालय कैलालीले सोडारीलाई आइतबार पक्राउ गरेको हो ।

सवारी ज्यान मुद्दामा सम्पर्कविहीन रहेका उनलाई आइतबार पक्राउ गरेको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले जानकारी दिए ।

उनीमाथि सवारी ज्यान मुद्दामा सोमबार म्याद थप गर्ने समेत डिएसपी जोशीले जानकारी दिए । ‘सवारी ज्यान मुद्दामा उहाँलाई नियन्त्रणमा लिएका छौँ ,’ डिएसपी जोशीले भने, ‘आज म्याद थप हुन्छ ।’

डिएसपी जोशीकाअनुसार गत पुस २ गते कैलालीको टीकापुरमा सोडारीले चलाएको जिपको ठक्करबाट ९९ बर्सिया दुर्गादेवी न्यौपाने घाइते भएकी थिइन् । बागमती प्रदेश ०१०२५ च ६६५५ नम्बरको जिपले ठक्कर दिदाँ घाइते भएकी न्यौपानेको उपचारका क्रममा नेपालगन्जमा पुस ११ गते मृत्यु भएको थियो ।