एमाले पाल्पाका पूर्वअध्यक्ष रायमाझी नेकपा एस प्रवेश

रुपन्देही । पाल्पाका पुराना एमाले नेता यादवबहादुर रायमाझी नेकपा एसमा प्रवेश गरेका छन् । नेकपा एमाले पाल्पाका पूर्वजिल्ला अध्यक्ष एवं पूर्व सांसद रायमाझी नेकपा एकीकृत समाजवादीमा प्रवेश गरेका हुन् ।

तानसेनमा पत्रकार सम्मेलन गरी रायमाझीले एमाले अध्यक्ष केपी ओलीले पार्टीलाई विधि विधान र कम्युनिष्ट आचारणविपरीत अधिनायकवादी सोंचअनुसार सञ्चालन गरेकाले एकीकृत समाजवादी रोज्न बाध्य भएको बताए ।

पाल्पामा एमालेको दुई कार्यकाल अध्यक्ष रहेका रायमाझी तत्कालीन नेकपामा विवाद हुँदा माधव नेपाल–प्रचण्ड पक्षमा थिए । तर एमाले विभाजनपछि भने उनी एमालेमै रहेका थिए । उनी एमालेका केन्द्रीय सल्लाहकार परिषद सदस्य थिए ।

विगतदेखि नै पार्टीमा चरम विकृति र बिसंगति बढेको र त्यसलाई सच्याउन प्रयास गरे पनि असफल भएको रायमाझीले उल्लेख गरे । रायमाझीले एकीकृत समाजवादीले दिने जिम्मेवारी इमान्दारिपूर्वक निभाउने बताएका छन् ।

उनीसंँगै एमाले जिल्ला कमिटी सदस्यहरु धनबहादुर रायमाझी, देवीप्रसाद पौडेल, महेश बराल पवि एकीकृत समाजवादीमा प्रवेश गरेको पार्टीका लुम्बिनी प्रदेश सचिव राजु गुरुङले जानकारी दिए ।