विवेकशील साझाले ‘महाकाली-मेची राष्ट्रिय एकता यात्रा’ गर्ने

काठमाडौं । विवेकशील साझा पार्टीले ‘महाकाली-मेची राष्ट्रिय एकता यात्रा’ सुरू गर्ने भएको छ । पृथ्वी जयन्ती तथा राष्ट्रिय एकता दिवसको अवसर पारेर यही पुस २७ मा कञ्चनपुरबाट यात्रा सुरू गरिने र माघ १६ गते शहीद दिवसको दिन झापामा अन्त्य हुने प्रवक्ता शरदराज पाठकले बताए ।

जातीय, क्षेत्रीय तथा धार्मिक रूपमा बढ्दै गएको मनोवैज्ञानिक दूरी कम गर्न यात्रामार्फत ‘विचारभन्दा माथि देश’ नै हो भन्ने भावना प्रवर्द्धन गर्दै राष्ट्रिय एकता तथा देशको स्वाधीनता, शान्ति, स्थिरता, विकास र दूरगामी हितलाई सुनिश्चित गर्ने विवेकशील साझा पार्टीका एजेण्डा सर्वसाधारणसम्म पुर्‍याउने विवेकशीलले जनाएको छ ।

देशको स्वार्थ भन्दा राजनीतिकर्मीको स्वार्थ प्रधान हुँदै जाँदा नेपालको स्वाभिमान क्षयीकृत हुँदै गएकोले सबैभन्दा माथि देश नै हो भन्ने भावना हामी प्रवर्द्धनको सुरूआतका लागि राष्ट्रिय एकता दिवस एकमात्र विकल्प भएको अध्यक्ष रवीन्द्र मिश्रले बताएका छन् ।