प्रदेश २ को नाम र राजधानीको सहमतिका लागि लोसपाले बनायो वार्ता टोली

जनकपुरधाम । लोकतान्त्रिक समाजवादी पार्टी (लोसपा) प्रदेश २ संसदीय दलले प्रदेशको नामाकरण र राजधानीमा लागि सहमति जुटाउन अन्य राजनीतिक दलहरूसँग वार्ता गर्ने भएको छ । प्रदेशको नाम मधेश र राजधानी जनकपुरधाम राख्न लोसपाको प्रस्ताव छ ।

लोसपाको वार्ता टोली संयोजकमा सांसद रानी शर्मा छिन् । ७ सदस्यीय टोलीमा सांसदहरू परमेश्वर साह, जैनुल राइन, अभिराम शर्मा, उपेन्द्र महतो, बाबुलाल साह र प्रल्हाद गिरी सदस्य छन् ।

पार्टीको निर्णय बमोजिम प्रदेशको नाम मधेश र राजधानी जनकपुरधामका लागि प्रदेशसभाभित्र रहेका दलसँग छलफल र सहमतीका लागि वार्ता टोली गठन गरेको लोसपा संसदीय दलका नेता जितेन्द्र सोनलले बताए ।

अगामी पुस ८ मा बस्न लागेको प्रदेशसभा बैठकमा प्रदेशको नामाकरण र स्थायी राजधानीको प्रस्ताव पेस गर्ने तयारी छ । राजधानी जनकपुरधाम तोक्न सबै दल सहमत छन् । तर, प्रदेशको नामाकरण विषयमा विवाद देखिएको छ ।

सत्तारुढ जनता समाजवादी पार्टी (जसपा) र नेकपा माओवादी केन्द्रले प्रदेशको नाम मधेश प्रदेश राख्ने प्रस्ताव गरिसकेका छन् । नेकपा एसले समेत मधेस प्रदेशमा सहमत हुने सम्भावना रहेको प्रमुख सत्तारुढ दल जसपाका नेताहरूको दाबी छ ।

कांग्रेस र नेकपा एमाले भने मधेश प्रदेश नामको विपक्षमा छन् ।