सभामुखलाई माधव नेपालको ढाडस-  अघि बढ्नुस्, हामी तपाईंको साथमा छौं

कास्की । नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले प्रतिनिधिसभाका सभामुख अग्निप्रसाद सापकोटाको साथमा आफ्नो पार्टी रहेको बताएका छन् । नेकपा एमालेद्वारा जारी संसद अवरोधलाई लक्षित गर्दै नेपालले सभामुखलाई दृढताका साथ अघि बढ्न आड दिएका छन् ।

नेकपा एस गण्डकी प्रदेश कमिटीले आज पोखरामा आयोजना गरेको कार्यकर्ता प्रशिक्षणमा उनले कानुनको शासनपालना गर्ने र संविधानको सर्वोच्चताको स्वीकार गर्नेहरूले सर्वोच्च अदालतको फैसला स्वीकार गर्नुपर्ने बताए । उनले भने, ‘सभामुखज्यू तपाईं एक्लो हुनुहुन्न, तपाईंको साथमा हामी पनि छौँ । दृढताका साथ अगाडि बढनुहोस् ।’

तत्कालीन एमाले पार्टीबाट विद्रोह गरेर कम्युनिष्ट आन्दोलन जोगाउन र बचाउन कानूनको आधारमा साहसिक कदम चालिएको उनको दाबी छ । उनले नेपालको राजनीतिमा कम्युनिष्ट पार्टीलाई स्थापित गर्दै माक्र्सवाद र लेनिनवादप्रति पूर्ण प्रतिबद्ध रहेर कम्युनिष्ट मूल्य, मान्यता र सिद्धान्तलाई आत्मसात् गरी बेतिथि, गरिबीलाई समाप्त गरेर सुन्दर समाजको निर्माणमा आफ्नो पार्टी लाग्ने बताए ।

कार्यक्रममा श्रम, रोजगार तथा सामाजिक सुरक्षामन्त्री किसान श्रेष्ठले गण्डकी प्रदेशमा आगामी दिनमा एकीकृत समाजवादीलाई पहिलो पार्टीका रुपमा स्थापित गरिने दाबी गरे ।
– रासस