प्रकाशमान गणेशमानको छोरोमात्र होइन, शशांक र शेखरले पनि समर्थन गर्नुपर्छ- सुजाता (भिडिओ)

काठमाडौं । नेपाली कांग्रेसकी नेतृ सुजाता कोइरालाले संस्थापनइतर समूह अब प्रकाशमान सिंहको नेतृत्वमा एकजुट हुुनुपर्ने बताएकी छन् । सिंहको प्यानलबाट उपसभापति उम्मेदवार बन्न लागेकी कोइरालाले नेपाल प्रेससँग कुरा गर्दै कांग्रेसलाई नयाँ गति दिन प्रकाशमानको नेतृत्वमा समावेशी टिम बनेको बताइन् ।

कोइरालाले गणेशमान सिंहको छोरोमात्र नभएर प्रकाशमानमा सबैलाई सम्मान गर्ने स्वभाव रहेको र कांग्रेसलाई हाँक्ने भिजन पनि रहेको बुझेर आफूले समर्थन गरेको प्रष्ट पारिन् । उनले कोइराला परिवारभन्दा ठूलो कांग्रेस भएको भन्दै अब चुनाव जितेर कांग्रेसलाई ठूलो पार्टी बनाउन प्रकाशमानको नेतृत्व आवश्यक रहेको बताइन् ।

कोइरालाले भनिन्– हामीहरु जित्छौं । नयाँ अनुहार, नयाँ विचारसहित समावेशी टिम छ । जनजाति, मधेसी,महिला सबैको टिम हो यो । अहिले कोइराला परिवारमा विभाजन भएको होइन, अरु पनि विस्तारै आउनुहुन्छ । शेखर कोइराला र शशांकले पनि प्रकाशमानलाई समर्थन गर्नुपर्छ ।