सभापतिको साझा उम्मेदवार तय गर्न पौडेल पक्षको निर्णायक बैठक सुरु

काठमाडौं । नेपाली कांग्रेसका वरिष्ठ नेता रामचन्द्र पौडेल समूहको बैठक अनुपम फुडल्याण्डमा सुरु भएको छ ।

१४ औं महाधिवेशनमा आफ्नो समूहबाट साझा उम्मेदवारको टुंगो लगाउन बैठक बसेको हो । सभापतिको साझा उम्मेदवार तय गर्न यो नै निर्णायक बैठक हुने नेताहरुले बताएका छन् ।

संस्थापन समूहबाट वर्तमान सभापति शेरबहादुर देउवा नै सभापतिका एक्ला दावेदार देखिएपनि इतर पक्षबाट धेरै आकांक्षी छन् ।

नेता कार्यकर्ताहरुले देउवासँग प्रतिस्पर्धा गर्न एकजना मात्रै सभापतिका लागि अगाडी बढ्नुपर्ने दबाव दिइरहेका बेला नेताहरु निरन्तर छलफलमा छन् ।

इतर समूहबाट अहिले वरिष्ठ नेता पौडेल, नेताहरु प्रकाशमान सिंह, शेखर कोइराला, शशांक कोइरालाले आफ्नो दावेदारी प्रस्तुत गरेका छन् ।

शशांकले पौडेलका लागि आफू ‘ब्याक’ तयार भएको बताएपनि शेखर र प्रकाशमानले भने आफ्नो दावी छाडेका छैनन् ।

आजबाट सुरु भएको महाधिवेशनमा उपसभापति विमलेन्द्र निधिले समेत आफू सभापतिमा लड्ने बताइसकेका छन् । यद्यपि उनले पौडेल साझा उम्मेदवार बन्ने अवस्थामा आफू बाधन नबन्ने पनि बताउँदै आएका छन् ।