ओमिक्रोन त्रास : सिक्किमले दियो नेपाली कलाकारलाई फिल्म फेस्टिभल स्थगित भएको जानकारी

सिक्किम । कोरोनाभाइरसको नयाँ भेरिएन्ट ओमिक्रोन फैलन थालेसँगै भारतको पूर्वोत्तर राज्य सिक्किमले त्यहाँ आयोजना गर्ने ग्लोबल फिल्म फेस्टिभललाई स्थगित गरेको छ ।

त्यहाँको संचार विभागले सूचना जारी गर्दै कोरोनाको नयाँ भेरिएन्टको कारण परिस्थिती पुनः अन्यौल थालेसँगै फेस्टिभललाई पोस्टपोन्ड गरिएको जनाइएको छ ।

मुख्यमन्त्री प्रेमसिंह तामाङको अध्यक्षतामा बसेको उच्चस्तरीय बैठकले फेस्टिभललाई तत्कालको लागि स्थगित गर्ने निर्णय गरेको उल्लेख छ । डिसेम्बर १० देखि १४ सम्म हुने भनिएको फेस्टिभल नहुने भएको छ ।

नेपाल प्रेससँग कुरा गर्दै सिक्किम फिल्म प्रवद्र्धन बोर्डकी अध्यक्ष पूजा शर्माले उपयुक्त समयमा फेस्टिभल आयोजना गर्ने बताइन् । फेस्टिभलको उद्घाटनसँगै सिक्किमले औपचारिकरुपमा फिल्म पर्यटनको शुभारम्भ गर्ने कार्यक्रम थियो ।

फेस्टिभलमा भाग लिन दुईदर्जन नेपाली फिल्ममेकर र भुटानी निर्मातालाई निम्तो दिइएको थियो । मुम्बईका चलचित्रकर्मी पनि जाने तयारीमा थिए । भारतको गृह मन्त्रालय र सिक्किम सरकारले विदेशीलाई राज्य प्रवेश गर्न नदिने निर्देशन दिएपछि फेस्टिभल अन्यौल बनेको हो ।

सिक्किम फिल्म प्रवद्र्धन बोर्डले नेपाली कलाकारलाई टेलिफोन गर्दै फेस्टिभल स्थगित भएको जनाएको छ ।